Аҕыйах хонуктааҕыта СИА, ааспыт 2023 сыл чулуу дьонун испииһэгин таһаарда. Манна “Дыгын оонньууларын” кыайыылааҕа Вячеслав Дьяконов, Азия Олимпиадатын призердара Сардаана Трофимова, Айаал Лазарев, “Оскар” бириэмийэ лауреаттара Максим уонна Евгения Арбугаевтар, Мииринэйтэн Саха сирин мөлүйүөн ахсааннаах олохтооҕо Онуфриевтар дьиэ кэргэн кыыстара, Эверест хайаны дабайбыт Евгений Кривошапкин, Оҕо литэрэтиирэтигэр бириэмийэ лауреата Валерия Потапова, Бүтүн Арассыыйатааҕы куонкурус лауреата Кэскилээнэ Лукина, Москубаҕа наҕараадаламмыт Тополинайтан Стручковтар дьиэ кэргэн, “II Вице-мисс Россия-2023” буолбут саха кыыһа Любовь Хохолова ааттаннылар.
Кинилэри сэргэ ЕГЭ эксээмэнигэр 100 баалы ылбыт выпускниктары ааттааттарылар. Кинилэр истэригэр биир бастакынан, Степан Макаров аатынан Чурапчы гимназиятын выпускнига, билигин Максим Аммосов аатынан ХИФУ устудьуона Тимур Куличкин ааттанна.
Тимур үрдүкү үөрэх кыһатыгар туттарсан киирээт даҕаны, бэйэтин таһыччы билиилээх, талааннаах устудьуон быһыытынан биллэрдэ. Кини университет сүүмэрдэммит хамаандатын 1-кы хамаандатыгар киирэн спортивнай программированиеҕа өрөспүүбүлүкэҕэ бастаабыттара. Онтон 2023 сыл ахсынньы 11-13 күннэригэр Санкт-Петербург куоракка ыытыллыбыт “ICPC Northern Eurasia Finals 2023” устудьуоннар аан дойдутааҕы чөмпүйэнээттэригэр “Ice Guys” хамаанда Тимур Куличкин, Владислав Обутов, Николай Дмитриев буоланнар дипломант үрдүк аатын ылан кэлбиттэрэ.
Сэмэн Жендринскэй