Алтынньы ый 1 күнүттэн, биир нэдиэлэ устата, Москва аннынааҕы Раменская куоракка ПОДА-ҕа (олорон эрэ волейболга) Арассыыйа чемпионата буолан ааста. Саха Сириттэн эр дьон, дьахталлар сүүмэрдэммит хамаандалара ситиһиилээхтик кыттан кэллилэр. Ол курдук, эр дьон хамаандата 7 -с миэстэҕэ таҕыста, оттон дьахталлар хамаандалара 3-с бириистээх миэстэҕэ тиксэн, боруонса мэтээл хаһаайыннарынан буоллулар. Бу хамаандаҕа биһиги улууспутуттан эдэр, кэскиллээх оонньооччу Анна Заровняева, бары кыаҕын толору туһанан, ситиһиилээхтик кытынна уонна Саха сирин хамаандата 3-с миэстэҕэ тахсарыгар суолталаах очукуолары аҕалла. Аня улахан түһүлгэҕэ аан бастаан кытынна.
“Аня – улууспут олорон эрэ волейболга дьахталларга сүүмэрдэммит хамаандатын капитана буолар. Кини хамаандатын өрөспүүбүлүкэтээҕи күрэхтэһиилэргэ үгүстүк бириистээх миэстэҕэ таһаарбыта.
Оттон биир дойдулаахпыт Станислав Никитин төрөөбүт дойдутуттан кынат анньынан, билигин Арассыыйа эр дьоҥҥо волейболга сүүмэрдэммит хамаандатын чилиэнинэн ситиһиилээхтик кытта сылдьар. Бу чемпионакка Стас Свердловскай уобалас эр дьон сүүмэрдэммит хамаандатыттан кыттан, Арассыыйа чемпиона буолары ситиһэн, кыһыл көмүс мэтээли кэттэ итиэннэ Арассыыйа успуорка маастарын нуорматын толордо.
Арассыыйа таһымнаах күрэхтэһиилэргэ үрдүк көрдөрүүлэр ситиһиллиилэрэ – Чурапчы улууһун сүүмэрдэммит хамаандатын тириэньэрэ, үрдүк категориялаах судьуйа, биир дойдулаахпыт Афанасий Эдуардович Кузьмин сыралаах уонна дьаныардаах үлэтин түмүгэ.
Эдэр кэскиллээх ыспарсымыаннарбыт Арассыыйа чемпионатыгар бириистээх миэстэни ылбыттарынан, Станислав маастар нуорматын толорбутунан, улуустааҕы успуорт управлениета, адаптивнай успуорт федерацията уонна улуустааҕы ВОИ уопсастыбаннай түмсүү аатыттан эҕэрдэлиибит, киэн туттабыт!
Түгэнинэн туһанан, төрөппүттэри: Аня ийэтин И.С. Петрованы, Стас ийэлээх аҕатын Д.Е., А.И. Никитиннэри, чугас дьоннорун, Аня дьиэ кэргэнин эҕэрдэлиибит. Эһиги өйөбүл, тирэх буоларгытын сыаналыыбыт, махтанабыт” – диэн улуустааҕы адаптивнай успуорт салайааччыта Иннокентий Матвеев санаатын үллэһиннэ.
Инникитин да тирии мээчик киэҥ туонатыгар өссө үрдүк ситиһиилэри баҕарабыт.
Анна Захарова.