Олунньу 9 күнүттэн, “Саха” НКИХ ханаалыгар “КЫАХ. ГТО Оонньуулара” саҥа бырайыак саҕаламмыта. Манна Сахабыт сирин биллэр ыспарсымыаннара, блогердара уонна араас идэ бэрэстэбиитэллэрэ кытыннылар. Биэриини Олег Колесов уонна биллэр тириэньэр, СӨ ГТО многоборьев бэдэрээссийэтин вице-бэрэсидьиэнэ Игнат Чомчоев иилээн-саҕалаан ыыттыллар.
Маҥнайгы түһүмэххэ 36 атлет кытта киирбит эбит буоллаҕына иккис түһүмэххэ 12 ыспарсымыан тургутууну ааспыттара. Оттон күн-бэҕэһээ үһүс түһүмэххэ алта атлет күөн көрүстүлэр.
“Бу бырайыакпытын успуордунан дьарыктанар дьон ортотугар ГТО көрүҥүн сайыннараары тэрийдибит. Биһиги кэтэспиппитинээҕэр элбэх киһи кэлэн кыттыбыттан олуһун үөрдүбүт. Бастакы сырыы диэтэххэ табылынна инньэ гынан маннык күрэҕи сылын аайы тэрийэр буолуохпут”, — диэн “Саха” НКИХ генеральнай продюсера Ньургун Торговкин эттэ.
“Бырайыак барыла өссө былырыын 2024 сыллаахха оҥоһуллубута. Ол онтубут олоххо киирэн бу билигин өрөспүүбүлүкэ үрдүнэн эт-хаан өттүнэн саамай сайдыылаах, барыга-бары бэлэмнээх атлетын быһаардыбыт. ГТО многоборьета инникитин олохпут нуорматын быһыытынан итиэннэ нормативтары туттарыыга төһүү күүс буоларыгар эрэнэбит”, — диэн Игнат Чомчоев санаатын үллэһиннэ.
Бастакы түһүмэххэ атлеттар үс мүнүүтэ иһигэр хас даҕаны хамнаныылары оҥордулар: сиртэн анньыныы, ис былчыҥын хачайдааһын, турникка тардыныы. Оттон иккис түһүмэххэ кыттааччылар челночнай сүүрүүгэ, берпи (эт-сиин бары былчыҥнарын үлэлэтии), трастер (олорон турар кэмҥэ ыараханы төбөттөн үөһэ өндөтүү), скакалкалааһыҥҥа уонна гиирэлээх олорон турууга күрэхтэстилэр. Үһүс түһүмэххэ алтыа буолан кытыннылар: Рустам Мубараков, Николай Филиппов, Андрей Захаров, Михаил Чупров уонна Айсен Охлопков.
Икки түһүмэх устата, Чурапчы улууһуттан төрүттээх, билигин Дьокуускай куорат Маҕан бөһүөлэгэр уоттан быһыыр баһаарынай чаас байыаһынан үлэлиир Ньургун Пинигин уопсай бириэмэтинэн үһүс миэстэҕэ сылдьыбыта оттон бэҕэһээ быһаарыылаах үһүс түһүмэххэ бастыҥ көрдөрүүлэнэн “КЫАХ. ГТО Оонньууларын” муҥутуур кыайыылааҕынан буолла итиэннэ 50 тыһыынча солкуобайдаах сэртэпикээтинэн наҕараадаланна. Манна даҕатан эттэххэ, Ньургун Айаалович – СӨ култууратын туйгуна Муосчут кыыһа Айылгы төрөппүт уола буолар оттон төрдө-ууһа Хоптоҕо нэһилиэгиттэн саҕаланар ол курдук эбэтэ Анна Гаврильевна Пинигина уҥуоҕунан кыра буолан баран кууллаах бурдугу соҕотоҕун көтөҕөрүнэн номоххо киирбит кырдьаҕастартан биирдэстэрэ онтон эһэтэ, аатырбыт худуоһунньук-муосчут Роман Михайлович Пинигин эдэригэр мас тардыһыытыгар “Манчаары” Оонньууларын чөмпүйүөнэ, призера этэ. Итиэннэ Олимпийскэй чөмпүйүөн Павел Павлович Пинигин хаан-уруу быраата. Онон бэрт сэниэлээх дьон удьуордара буолар.
Санатан эттэххэ, бу бырайыак эрэгийиэннээҕи физическэй култуураҕа уонна успуорт министиэристибэтин уонна СӨ ГТО многоборьетын бэдэрээссийэтин өйөбүллэринэн тэрилиннэ.
Сэмэн ЖЕНДРИНСКЭЙ