Оҕо ордук кыра сааһыгар саҥаны билиэн-көрүөн, арыйыан баҕата күүстээх буолар, бу айылҕа сокуона. Кыра киһи тулалыыр эйгэтин ураты истиҥник дьиктиргээн көрөр. Бу интэриэһин сөпкө табан оҕону кыра сааһыттан чинчийэр үлэҕэ угуйуохха сөп.
Мария Тимофеевна Спиридонова аатынан Чурапчытааҕы «Чуораанчык» уһуйааҥҥа оҕолору чинчийэр дьоҕурдарын сайыннарар үлэ күүскэ ыытыллар. Улууска, өрөспүүбүлүкэҕэ ыытыллар куонкурустарга, бырайыактарга сылын ахсын оҕолорбут кыттан кэллилэр. Ол курдук, уһуйааммыт бэлэмнэнии бөлөҕүн иитиллээччитэ, алта саастаах Марк Седалищев, кыра сааһыттан билиэн-көрүөн баҕатын, чинчийэр дьоҕурун таба көрөн, иитээччитэ Наталья Константиновна Гурьева, Марк ийэтинээн Анна Владиславовналыын, Маригы научнай үлэҕэ сыһыаран, иккис сылын научнай практическай хабааннаах кэмпириэнсийэлэргэ, чинчийэр күрэхтэргэ кытыннараллар.
Марк дьон иннигэр толлубакка санаатын сайа этэр, чинчийэрин сөбүлүүр, айар үлэҕэ сыстаҕас буолан «Я-Исследователь — 2024» Бүтүн Арассыыйатааҕы чинчийэр үлэ уонна сонун бырайыактар күрэхтэрин Өрөспүүбүлүкэтээҕи түһүмэҕэр 1-кы степеннээх диплому ылары ситиспитэ. Марк «Мой герой – Водомен» бырайыагынан Саха Сирин улуустарын кыайыылаахтарын кытта тэҥҥэ күрэхтэһэн бастыҥнар ааттарыгар киирэн биһигини олус үөрдүбүтэ.
Марк Седалищев быйылгы саҥа бырайыагар, улуу тириэньэрбит Дмитрий Петрович Коркин дьарыктаабыт тренажердарыгар интэриэһи тардар, үйэтитэр уонна киэҥ араҥаҕа тарҕатар сыаллаах «Парк активного отдыха «Өрөгөй» имени Дмитрия Петровича Коркина» бырайыагынан «АРХИЛИГА-2024» өрөспүүбүлүкэтээҕи аһаҕас кэтэхтэн көрүү чемпионатын Гран-При хаһаайына. Саҥа буруолуу сылдьар ситиһиитинэн, «Наука будущего» уһуйаан саастаах уонна алын кылаас оҕолоругар өрөспүүбүлүкэтээҕи научнай практическэй кэмпириэнсийэ «Математика, техника» хайысхатыгар 1 степеннээх лауреат аатын ылыыта буолар.
Марк оҥорбут дьон сынньанар паарката ымпыгар-чымпыгар тиийэ толкуйдаммыт. Паарка былаһааккалара Дмитрий Петрович Коркин үс олимпийскэй чөмпүйүөннэри иитэн таһаарбытын бэлиэтээн олимпийскай тиэрбэс (кольцо) быһыытынан оҥоһуллубуттар. Халлаан күөх былаһааккаҕа олимпийскай уоттаах фонтан, дьон фонтан кэрэ көстүүтүнэн уонна сылаас кэмҥэ утахтарын ханнаран айылҕа уутун иһэр усулуобуйа баар. Хара былаһааккаҕа Дмитрий Петрович эти-сиини эрчийэр маһынан оҥоһуллубут тренажердара, кыһыл былаһааккаҕа – арт-объектар бааллар, онно дьон сынньана таарыйа хаартыскаҕа түһэргэ бэлэм телефон штатива туруоруллубут. Араҥас былаһааккаҕа дьиэ-кэргэнинээн, доҕоттордуун кэлэн айылҕаҕа сынньанар, кинигэ ааҕар усулуобуйа тэриллибит, от күөх былаһааккаҕа араас дьаһаллары ыытар трибуна, кэнсиэрдиир сыана баар. Кытыытынан эргиччи дьон сүүрэр суола, ону таһынан, маҕаһыыннар, киоскалар, аһыыр сирдэр (кафелар) бааллар. Бу бырайыак олоххо киирэрэ буоллар, дьон-сэргэ махтала муҥура суох буолуо этэ.
Кырачаан чинчийээччигэ, кыайыыга кынаттаабыт уһуйааччытыгар Наталья Гурьеваҕа уонна Марк төрөппүттэригэр Анна, Роман Седалищевтарга истиҥ эҕэрдэбитин тиэрдэбит.
Оксана Оконешникова, «Чуораанчык» уһуйаан сүрүннүүр иитээччитэ
Бэлэмнээтэ Сэмэн ЖЕНДРИНСКЭЙ