С.К. Макаров аатын сүгэр Чурапчы гимназиятын “Күн Өркөн” кыраайы үөрэтэр лааҕыра 2008 сылтан сайын ахсын оҕолору түмэр, быйыл 15-с төгүлүн үлэтин ыытар.
Бэс ыйын 18 күнүгэр бу лааҕыр оҕолоро Төлөй сиригэр үлэлээтибит. Төлөйгө киириигэ үтүө үгэс олохтоммутун бэлиэтии көрдүбүт – “выпуск” диэн суруктаах сынньанар беседкалар, ыскамыайкалар, хачыаллар, бэл, төбүрүөннээн олорон эргийэр оҥоһук кытта баар. Бу оҥоһуктары оскуоланы бүтэрбит оҕолор үбүлүөйдээх сылларыгар төрөөбүт нэһилиэктэригэр бэлэх ууналлар эбит.
Сир-дойду, от-мас муҥутаан тыллыбыт кэмигэр, үтүөкэн эбэ кытылыгар кыталык үҥкүүлээн ааспыт түөлбэтигэр ураты дьарыктаах дьону кытта көрүстүбүт. Туойунан дьарыктанар Наталья Гуляева биһигини балаҕаҥҥа үөрэ көрүстэ. Бу дьиэ тыына сылаас, сырдык. Долбуурга оҕолор туой оҥоһуктара кэккэлээбиттэр, биир өртүгэр туттар маллара ууруллубуттар, бэтэрээ – оҕолор уруһуйдара.
Наталья Егоровна туой киһи айылгытын туруктаах оҥорорун, туой туһатын, эмтээҕин кэпсээтэ. Итини таһынан туойунан дьарыгырар оҕо доруобуйата тупсар, саҥата сайдар, сахалыы саҥарар чахчылара биллибиттэр. Кырдьык, туой туох эрэ дьиктилээх. Аан дойду мусуойдарыгар көрдөххө, устуоруйа кэпсииринэн, маҥнайгы иһиттэрэ туой буолар түүр омуктар билигин да туой иһиттэн аһаан олороллоро киһини толкуйдатар.
Биһиги ордук Аан Алахчын диэн ааттаах оҥоһугу сэҥээрдибит. Омос көрдөххө, статуя курдук, оттон маастар кэпсээбитигэр өйдөөн көрбүппүт – иһит эбит. Үс чаастан турар, үөһэ өттө – хаппах, салама тутан турар дьабакалаах бэргэһэлээх, сиэллээх сонноох дьахтар, ортото – төгүрүк иһит, алларата – үс атахтаах тирэх. Маны таһынан оҕолор аныгы ньыманы туттан киэргэллэрин уурар иһиттэрин сэҥээрдибит: араас дьүһүннээх, дьэдьэн, сибэкки, сүрэх ойуулаахтара киһини үөрдэр.
Наталья Егоровна барыбытыгар үтүө санааны баҕаран, кытыан оту уматан, арчыланныбыт, ыраастанныбыт, махтанныбыт уонна салгыы тимир ууһугар бардыбыт.
Герасим Тарабукин маҥнай быһах охсор эбит, оттон билигин хомус оҥоруутунан дьарыктанар. Биир да бүппүт хомуһа ордубат, кэтэһэн, манаан туран илдьэ бара тураллар эбит, ол иһин бүппүт хомуһу көрбөтүбүт. Билигин да 100-тэн тахса сакаастаах үлэлии олорор. Герасим Эдуардович соҕотуопкаларын бэлэмнээбит, ону хайдах токурутарын көрдөрдө, ол кэнниттэн маҥнай болотунан, онтон өтүйэнэн охсон, тэҥнээн биэрдэ. Салгыы хомус тылын хайдах оҥорору көрдөрдө. Кини уонунан сыл мунньубут уопутун кэпсээтэ. Герасим Эдуардович хомуһа уһун тыыннааҕынан, орто куоластааҕынан биллэр эбит. Саха сирин бастыҥ виртуоз-хомусчуттара Дьүрүйээнэ, “Айархаан” бөлөх, Уутай уонна да атын биллэр хомусчуттар оҥортороллорун истэн сэҥээрдибит. Быйыл «Аан дойду виртуоһа» үрдүк аатын 3 хомусчут ылла диэн үөрүүтүн үллэстэр. Онон талааннаах ууспутугар Герасим Эдуардовичка улахан эҕэрдэбитин тиэрдэбит.
Бараары туран, 10*12-лээх акылаат түспүтүн көрөн ыйыттыбыт – Герасим Эдуардович ыччаттарга анаан спорт саалатын туттан эрэр эбит. Бэйэтэ кыра эрдэҕиттэн тенниһинэн дьарыктанар киһи, саалатыгар теннис остуолларын туруоран, Төлөй ыччата теннис спордугар сыстан, чэгиэн туруктанарыгар биир улахан хардыыны оҥорон эрэр эбит диэн сөхтүбүт. Санаабыт санаата олоххо киириэ диэн эрэнэбит.
Маннык биир туһалаах күн биллибэккэ ааста. Онтон эн, үөрэнээччи, сайыҥҥын хайдах атаара сылдьаҕыный?
“Күн Өркөн” кыраайы үөрэтэр лааҕыр пресс-киинэ