Бу күннэргэ Арассыыйа Бэрэсидьиэнин Гранын куонкуруһун түмүгэ билиннэ. Чурапчы улууһуттан икки бырайыак кыайыылааҕынан таҕыста. Ол курдук, Бэрэсидьиэн граныгар «Дарханнар» Чурапчы орто оскуолатын уопсастыбаннай түмсүүтэ «Сылы эргиччи үлэлиир интеллектуальнай Го оонньуу оскуолата» диэн бырайыага уонна Оҕо ыспартыыбынай оскуолатын «Инклюзивный спорт «Закон семи рукопожатий»» диэн доруобуйаларынан хааччахтаах оҕолорго аналлаах бырайыага тигистилэр.
Бастакы, Го оонньууга сыһыаннаах бырайыак ааптарынан нуучча тылын уонна литературатын учуутала, интеллектуальнай оонньууларга тириэньэр Надежда Захарова буолар.
Го диэн интеллектуальнай оонньуу секцията С.А.Новгородов аатынан Чурапчы орто оскуолатыгар ситиһиилээхтик үлэлиир.
«Сиэксийэ бастыҥ оҕолоро алтынньыга өрөспүүбүлүкэтээҕи турнирга ситиһиилээхтик кыттан, ахсынньыга Екатеринбург куоракка «Полиметалл IX-с кубога” диэн турнирга тус рейтиннэрин үрдэтэн кэллилэр. Бу Урал саамай үрдүк таһымнаах турнирыгар Саха сириттэн уопсайа 8 оҕо күрэхтэстэ. Чурапчыттан 3 үөрэнээччи кытынна. Даҕатан эттэххэ, бу сайын Дьокуускайга ыытыллар норуоттар икки ардыларынааҕы «Азия оҕолоро» спортивнай оонньууга 6 «в» кылаас үөрэнээччитэ Мичил Алексеев Саха сирин сүүмэрдэммит хамаандатыгар киирэн бэлэмнэнэр. Маны таһынан ахсынньыга «Кубок Якутска» турнирга Чурапчы оҕолоро миэстэлэһэн, инники сылдьалларын дакаастаатылар. Тэрийээччилэр, сүрүн судьуйалар кыттааччылар маастарыстыбалара биллэрдик үрдээбитин бэлиэтээтилэр», — диэн тириэньэр Надежда Захарова билиһиннэрдэ.
Кини быйыл сыл түмүгүнэн улууска, өрөспүүбүлүкэҕэ Го оонньуутун тарҕатыыга, сайыннарыыга кылаатын иһин тустаах федерация Махтал суругунан, харчынан бириэмийэтинэн наҕарадааланна.
Интеллектуальнай Го оонньууну сэҥээрээччи сыллата элбээн иһэр. Манна сааһынан хааччаҕа суох, уол уонна кыыс, эр киһи уонна дьахтар диэн арахсыбакка, оскуола оҕото улахан да киһини кытта оонньуон сөп. Гоҕа сатабыл уонна уопут оруолу оонньуур (кю, рейтинг).
Онон 664 821 солк. суумалаах федеральнай грант көмөтүнэн Надежда Гаврильевна ааптардаах анал бырайыак олоххо киирэн, улуу Кытай былыргыттан кэлбит оонньуута биһиги улууспутугар киэҥник тарҕанан, өссө үрдүк чыпчааллары ситиһэллэригэр эрэнэбит. Бэлиэтээн эттэххэ, бырайыак чэрчитинэн Чурапчы улууһун 5 оскуолатын хабан былааннаах үлэ ыытыллыаҕа.
Марфа Петрова.