Бэҕэһээ, о.э. сэтинньи 23 күнүгэ, СӨ Ил Дархана Айсен Николаев, элбэх оҕолоох ийэлэргэ итиэннэ өрөспүүбүлүкэ социальнай-экономическай сайдыытыгар улахан өҥөлөөх дьахталларга судаарыстыбаннай наҕараадалары туттарда.
Өрөспүүбүлүкэ Аҕа баһылыга, тапталларынан, уҕараабат кыһамньыларынан бэйэлэрин оҕолоругар эрэ буолбакка уопсастыбаҕа бүтүннүүтүгэр холобур буолар ийэлэргэ махтал тылларын эттэ.
2024 сылы Дойду бэрэсидьиэнэ Владимир Путин – дьиэ кэргэн сылынна биллэрбитэ. Манна туһаайан Айсен Сергеевич, дьиэ кэргэн үтүө үгэһэ, нус-хас олоҕо дьон-сэргэ уопсай туругар ситиһии төрүөтүнэн буоларын ыйда. Ону таһынан судаарыстыба сүрүн кыһамньыта — дьиэ кэргэни, ийэлэри, оҕо-аймаҕы өйөөһүн буолар диэн бэлиэтээтэ.
“Ийэ буолуу диэн бу улахан чиэс, уустук үлэ. Ол инниттэн ийэлэри өйөөһүн үрдүк таһымнаах буолуохтаах. Биһиги өрөспүүбүлүкэбит дьиэ кэргэн бэлиитикэтигэр бастыҥ холобур буолар. Экономикаҕа, социальнай эйгэҕэ ситиһиибит сүрүн сыалынан – Сахабыт сирин бүтүннүүтүгэр дьон олоҕун, дьиэ кэргэн олоҕун тупсарыы буолар. Өрөспүүбүлүкэбит бүтэһик кэминээҕи ситиһиитигэр нэһилиэнньэ улаатыытын туһунан, бэрэсидьиэн Владимир Путин итиннэ сигэнэн эппитэ”, — диэтэ Ил Дархан.
Инньэ диэн туран биир бастакынан, Ийэҕэ үрдүкү махтал бэлиэни, педагогическай үлэ бэтэрээнигэр, РФ уопсай үөрэхтээһинин бочуоттаах үлэһитигэр, Чурапчы улууһуттан Федосия Колесоваҕа туттарда. “Дьоруой-Ийэ” бэлиэлэринэн Дьокуускай куораттан 11 оҕолоох Любовь Иванова, Анаабыр улууһун Сааскылаах нэһилиэгиттэн 10 оҕолоох Анастасия Рудых, Дьокуускай куораттан Чынара Тешебаева наҕаарадаланнылар.
Санатан эттэххэ, Саха сирэ комплекснай миэрэ өйөбүлүн оҥорууга Илин Уһук эрэгийиэнигэр бастакы миэстэни оттон оҕо төрөөһүнүнэн 7-с миэстэни ылар, нэһилиэнньэ улаатарыгар инники күөҥҥэ сылдьар. Сылтан сыл аайы элбэх оҕолоох дьиэ кэргэн ахсаана биллэ улаатар. Бүгүҥҥү күҥҥэ Саха сиригэр 34 тыһыынча элбэх оҕолоох дьиэ кэргэҥҥэ 119 тыһыынча оҕо иитиллэр.
Сэмэн Жендринскэй. Андрей Сорокин хаартыскаҕа түһэриитэ