Чурапчыттан өссө биир ааптар хоһооно “Үрдэл” музыкальнай бириэмийэҕэ ситиһиилэннэ

Бэҕэһээ, “Үрдэл” национальнай музыкальнай бириэмийэ Х-с үбүлүөйүнэй сылыгар, Чурапчыттан САРДААНА тылларыгар Сахая “Оҕобор” диэн ырыатынан “Көрөөччү биһирэбилэ” буолла диэн таһаарбыппыт.

Ол эрэн Чурапчы ситиһиитэ итинэн эрэ түмүктэммэтэ, КУЙААР УОЛА уонна САЙДАМ толорууларыгар, Роман Константинов аатынан Амма орто оскуолатын 11 кылааһын үөрэнээччитэ Самсон Иннокентьев тылларыгар “Истиий” диэн ырыа бэлиэтэннэ.

Мындаҕаайы төрүт олохтоохторо Самсон Самсонович уонна Евдокия Михайловна Иннокентьевтар дьиэ кэргэн Самсон диэн маанылаах уоллара, бу маннык улахан музыкальнай бириэмийэҕэ ситиһиилэммитинэн эҕэрдэлээн биэриэҕин.

Эдэр ааптар төлөпүөнүн нүөмэрин буламмыт, быһа сибэээскэ таҕыстыбыт: “Хоһоону айан саҕалаабытым бэһис сылыгар барда. Кыралаан өрөспүүбүлүкэҕэ ыытыллар поэзия куонкурустарыгар кыттабын, ол онно литэрэтииринэй псевдонимым Хоһоонньут Суосун диэн. Суосун диэн эһэм аатын ылыммытым, кини бэйэтэ эмиэ айар дьоҕурадаах киһи эбитэ үһү. Хоһооннорбун эрдэ учууталларым Валентина Романова-Чыскыырай, Александра Николаевна Васильева чочуйан сааһылаан биэрэллэрэ онон түгэнинэн туһанан кинилэргэ улахан махталбын биллэрэбин, айар аартык суолбун арыйан биэрбиттэрэ, холобур буолбуттара. Кинилэри сэргэ хаан-уруу убайым Александр Дьячковскай-Ырыа Саарын эмиэ айар үлэбэр улахан өҥөлөөх. Оттон бу “Истиий” диэн хоһооммун кыыска анаабытым.

Ырыаны толорооччу, матыып ааптара Альберт Третьяков-Куйаар Уола манна Мындаҕаайыбытыгар кэлэн норуот айымньытын дьиэтигэр кэлэн үлэлии сырыттаҕына билсиһэммит, кини устуудьуйатыгар дьарыктанан, хоһооннорбун көрдөрбүтүм. Ол онтон ырыа буолан көппүтэ диэхпин сөп. Өссө төгүл барыгытын Саргылаах Саҥа дьылынан эҕэрдэлээн туран, бу ырыабар куоластаабыт, мин туспар ыалдьыбыт доҕотторбор, дьоммор-сэргэбэр, ырыаны толорооччуларга бука барыларыгар улахан махталбын тиэрдэбин”, — диэн Самсон олус дуоспуруннаахтык этэн-тыынан кэбистэ.

Улууспут кэскиллээх ыччата, ырыаны айарым бу манан түмүктэммэт диэтэ, элбэх хоһооннордооҕун туһунан сырдатта. Оскуоланы бүтэрэн баран олоҕун успуорду кытары ситимнээри сылдьарын улаханнык сэргии иһиттим. Оҕо киһи диэтэххэ Амма оскуолатын иһинэн “TIMIR GYM” диэн ыспартыыбынай клуб тэринэн үөрэнээччилэри мас тардыһыытыгар дьарыктыыр эбит, төһө даҕаны анал тириэньэр суоҕун үрдүнэн бэйэтэ бу успуорт көрүҥүнэн утумнаахтык дьарыктанарын туһунан кэпсээтэ.

Онон Самсоҥҥа бары үчүгэйи, ситиһиини баҕарыаҕын.

 

Сэмэн Жендринскэй. Хаартыскалары ыстатыйа дьоруойа бэйэтэ тиксэрдэ