Бу саас өрөспүүбүлүкэтээҕи “Снежный барс” байыаннай-патриотическай күрэхтэһиигэ Чурапчы улууһун хамаандата кыайан, өрөспүүбүлүкэ чиэһин көмүскүү Бүтүн Арассыыйатааҕы “Победа” байыаннай-патриотическай оонньууга кытта сылдьар.
И.М. Павлов аатынан Чурапчы орто оскуолатын үөрэнээччитэ, “Память” байыаннай-патриотическай кулууп иитиллээччитэ Дьулуур Попов күрэхтэһиигэ хайдах кытта сылдьалларын, бэйэтин санаатын үллэстэр:
— Биһиги Чурапчыттан түөрт оскуолаттан хомуллан кэлбиппит, тренердэрбит Петр Егоров, Александр Оконешников буолаллар. Күрэхтэһиибит Москваҕа Алабино полигонугар буола турар. 6 көрүҥҥэ күрэхтэһэбит. Ол курдук, строевой, огневой рубеж, военизированнай эстафета уонна бэйэни билиһиннэрии буолбута. Бүгүн история көрүҥэ хаалла.
Иллэҥ кэммитигэр аралдьытар кииҥҥэ сылдьабыт, киэһэтин үҥкүү тэриллэр. Аралдьытар кииҥҥэ дрон ыытааһына, реакция бэрэбиэркэлээһинэ, остуол футбола уонна аэрофутбол баар. Ону таһынан маастар-кылаастар буолаллар, онно медицинэ, дрону күөрэтии, миинэни көрдөөһүн, автомат араастарын үөрэтии, ыһыы-хомуйуу, холостуой ботуруонунан ытыы, дистанцияны линейканан эбэтэр биноклунан кээмэйдээһин баар.
Күрэхтэһиигэ иккис сырыыбын кыттабын, олус үчүгэй, элбэҕи билэбит-көрөбүт, үөрэнэбит. Барыта 87 хамаанда баар, атын эрэгийиэн оҕолорун кытта билсэбит. Маннык күрэхтэһии биһигини төрөөбүт дойдубутун таптыырга, бэриниилээх буоларга, кинини көмүскүүргэ үөрэтэр.
Бүтүн өрөспүүбүлүкэ чиэһин көмүскүү сылдьар Чурапчыбыт оҕолоругар ситиһиилэри баҕарыаҕыҥ.
Елена Макаринская