Ахсынньы 3 күнүгэр Уус Алдан улууһун киинигэр Бороҕоҥҥо, В.Никифоров – Күлүмнүүр аатынан “Тойон Мүрү” култуура дыбарыаһыгар, хомусчут импровизатор, СӨ култууратын туйгуна Альберт Алексеевич Находкин ааптарыскай бырайыагынан 15 төгүлүн ыытыллар “ Хомус кырдала” өрөспүүбүлүкэтээҕи хомусчуттар күрэхтэрэ , өрөспүүбүлүкэ араас муннуктарыттан элбэх кыттааччыны түмтэ. Тэрийээччилэр: Аан дойдутааҕы хомус түмэлэ, Уус Алдан улууһун култуураҕа управлениета, Тандатааҕы норуот айымньытын дьиэтэ. Барыта 172 киһи: 15 ансаамбыл, 34 биирдиилээн толорооччу бу улахан хомус түһүлгэтигэр кытыннылар. Дьүүллүүр сүбэ бэрэссэдээтэлинэн СӨ үтүөлээх артыыһа, “Душа России” анал бириэмийэ хаһаайына, аан дойду виртуоз хомусчута, “Айархаан “бөлөх салайааччыта Альбина Дягтерева – Айархаана- Хомус Хотун үлэлээтэ.
Бу күрэх ааптара, тэрийээччитэ Альберт Находкин билигин Байаҕантай нэһилиэгин култууратын дириэктэринэн үлэлиир. 2008 сыллаахха Тулунаҕа , култуура дьиэтигэр уус- уран салайааччынан үлэлии сылдьан, аан бастаан нэһилиэк иһинэн”Хомус кырдала” хомус күрэҕин тэрийбитэ. Онтон улуус иһинэн ыытыллыбыта, салгыы сайдан, кэҥээн,тэнийэн региональнай буолбута, кэнники өрөспүүбүлүкэтээҕи күрэх буолан, Саха сиригэр Уус Алдан улууһун аатын ааттатар биир улахан тэрээһин буолар.Сылтан сыл кыттааччы ахсаана элбээн, оонньооччулар таһымнара үрдээн,оонньуур маастарыстыбалара тупсан иһэр. “Уус Алдан улууһун дьаһалтата, култуура салалтата, бар дьонум куруук өйүүллэр, улахан бириистэри туруораллар” – диэн кэпсиир Альберт Алексеевич. Ол курдук быйылгы күрэххэ улахан сыаналаах бириистэри таһынан, кыайыылаахтарга Уус Алдан уустара оҥорбут хомустарын туттардылар. Альберт Алексеевич бэйэтэ тэрийээччи эрэ буолбакка, улууһугар хомус сайдыытыгар, дьоҥҥо- сэргэҕэ тарҕатыыга үгүс үлэни тэрийэр,нэһилиэктэри кэрийэ сылдьан маастар кылаастары ыытар, ансаамбыллары, биирдиилээн хомусчуттары кытта үлэлэһэр эбит. “ Хомус кырдала” күрэх хас биирдии толорооччу таһымын, маастарыстыбатын үрдэтэр, хас биирдии кыттааччыга саҥа таһымҥа тахсарыгар кыах биэрэр. Бу күрэхтэн үүнэн, кынаттанан тахсыбыттара биллиилээх хомусчуттар Алдан Рожин, Айсен Дьоллоохоп, “Кэскил” уолаттар образцовай ансаамбыллара.
Быйылгы күрэх Кылаан чыпчаал кыайыылаахтарынан буоллулар: бөлөҕүнэн толорууга “Оһуор” бөлөх — Уус Алдан, Тулуна(сал.Людмила Жиркова), биирдиилээн толорууга Анна Максимова — Мэҥэ Хаҥалас, Төхтүр.
Чурапчыттан “Дьиэрэй” хомусчуттар бөлөхтөрө(салайааччы Александра Игнатьева) кыттан, “Түһүлгэлээх хомусчуттар” анал ааты ыллыбыт. Саҥа тэриллибит, аан бастаан улахан түһүлгэҕэ кыттыбыт бөлөххө бу улахан ситиһии буолар. Биирдиилээн толорооччуларга Наталья Устинова кыттан үһүс үрдэли ылан, Уус Алдан ууһа оҥорбут хомуһунан наҕараадаланна.
Салайааччыбытыгар Александра Александровна Игнатьеваҕа, бу ыраах айаҥҥа илдьэ сылдьыбыт суоппардарга Иван Беляевка, Родион Ивановка Улахан махталбытын тиэрдэбит.
Наталья Захарова.