Чурапчыттан «Азия оҕолоро»  оонньууларга 33 оҕо кыттыыны ылыаҕа

“Азия оҕолоро” Норуоттар икки ардыларынааҕы VIII оонньуулара саҕаланара аҕыйах хонук хаалла. Онньууларга тас дойдулартан 24 хамаанда,  Арассыыйаттан 5 хамаанда кыттыахтара. Барыта 2850 кыттааччы кэлэрэ былааннанар, итинтэн спортсменын ахсаана – 2020. Саамай бөдөҥ хамаандалар Казахстантан, Кыргызстантан, Узбекистантан, Беларусьтан кэлэллэрэ күүтүллэр. Кыттааччылар спорт 24 көрүҥэр күрэхтэһиэхтэрэ. Бу туһунан СӨ Ил Дарханын уонна СӨ Бырабыыталыстыбатын пресс-сулууспата иһитиннэрэр.

Биһиги улууспутуттан «Азия оҕолоро»  оонньууларга 33 оҕо 5 көрүҥҥэ кыттыаҕа. Ол курдук волейболга, тустууга, чэпчэки атлетикаҕа, остуол тенниһигэр, сахалыы ыстаныыга уонна  саҥа киирбит көрүҥнэргэ – Го оонньууга, “Алыш” курдаах тустууга.

«Азия оҕолоро» оонньуу сүүмэрдээһинэ икки сыллааҕыта 3 түһүмэҕинэн ыытыллыбыта. Ол кэнниттэн оҕолор үгүс  сүүмэрдээһини ааспыттара, Самара куоракка бара сылдьыбыппыт. Онтон норуоттар икки ардыларынааҕы, Арассыыйа таһымнаах турнирдарга кыттыбыппыт. Волейболга өрөспүүбүлүкэ чиэһин көмүскүүр кыргыттар хамаандаларын састаабыгар Чурапчыттан, Уус Алдантан, Мэҥэ Хаҥаластан уонна Дьокуускай куораттан бааллар. Чурапчы улууһуттан үс кыыс кыттаары сылдьар.

Күһүҥҥүттэн, балаҕан ыйыттан, 2023-2024 үөрэх дьылын манна Чурапчыга кэлэн, Д.П. Коркин аатынан спортивнай интэринээт — оскуолаҕа үөрэнэ, дьарыктана сылдьаллар. Күҥҥэ иккитэ дьарыктанабыт. Билигин манна дьарыкпыт бүтэһик түһүмэҕэ  буола турар. Онтон Дьокуускай куоракка саҥа спортивнай комплекска тиийэн салгыы дьарыктаныахтаахпыт», — диэн старшай тириэньэр Саргылана Оконешникова үллэстэр.

«Азия оҕолоро» оонньуулар Азия дойдуларын уонна Арассыыйа эрэгийиэннэрин 17-гэр диэри саастаах эдэр спортсменнарын түмэр, эйэни, доҕордоhууну бөҕөргөтөр уонна чөл олоҕу пропагандалыыр сыаллаах ыытыллар. Бу эппиэтинэстээх, бөдөҥ спортивнай күрэххэ кыттар оҕолорбутугар ситиһиини баҕарыаҕыҥ.

Людмила Горохова, ааптар хаартыскаҕа түһэриитэ уонна видеоҕа устуута.