Дьокуускайга “Калейдоскоп талантов” аһаҕас фестиваль ыытылынна. Бу фестиваль чэрчитинэн оҕо искусство оскуолатын үөрэнээччилэрин икки ардыларыгар фортепиано хайысхатыгар уонна “Вопросы фортепианного искусства” диэн научнай-айымньы кэмпириэнсийэтигэр дакылаатынан кыттыыга өрөспүүбүлүкэтээҕи куонкурус тэрилиннэ. Манна Дьокуускайтан, Ленскэйтэн, Бүлүүттэн, Хатастан, Жатайтан, Намтан уонна Чурапчыттан барыта 100-тэн тахса оҕо кытынна. Дьүүллүүр сүбэ бэрэссэдээтэлинэн Москва куораттан толорор искусство киин мусукаалынай оскуола-академиятын фортепиано кафедратын сэбиэдиссэйэ, фортепиано факультетын декана Н.В.Богданова үлэлээтэ, ону таһынан фортепиано хайысхатыгар маастар кылаас тэрийдэ.
Биһиги улууспутуттан бу улахан куонкуруска Оҕо искусство оскуолатын үөрэнээччилэрэ Күннэй Местникова, Таня Старостина оскуолаларын аатын чиэстээхтик көмүскээтилэр. Таня олус ситиһиилээхтик кытынна уонна фортепиано номинацияҕа 3-с истиэпэннээх лауреат аатын сүктэ итини тэҥэ научнай кэмпириэнсийэҕэ дакылаатынан кыттан 2-с истиэпэннээх лауреат буолары ситистэ. Кини биир дойдулаахпыт Никифор Яковлев “Кулунчук” уонна улуу нуучча композитора П.И.Чайковскай “Старинная французкая песенка” диэн айымньыларын толордо.
Чурапчытааҕы оҕо искусство оскуолатын фортепиано кылааһын салайааччы Светлана Макарова билиһиннэрбитинэн, маннык кэмпириэнсийэҕэ фортепиано кылааһа бастакытын кытынна. Куонкуруска Дьокуускай куорат Оҕо искусство оскуолатын үгүс үөрэнээччитэ ситиһиилээхтик кыттан, лауреаттарынан буоллулар. “Үөрэнээччилэрим Күннэй Местникова, Таня Старостина бэйэлэрин кыахтарынан олус бэркэ кытыннылар. Оҕо маннык куонкурустарга сылдьан дьоҕурун сайыннарарыгар, бэйэлэрин саастыылаахтарын кытта алтыһан муусука эйгэтигэр маастарыстыбатын үрдэтэригэр, дьон-сэргэ иннигэр тахса үөрэнэригэр үгүһү билэр, сайдар. Онон оскуолам салалтатыгар, төрөппүттэрбэр өйөбүллэрин иһин махтанабын”, — диэн санаатын үллэһиннэ. Күннэйдээх Таня маннык улахан куонкуруска кыттан сертификаттары уонна грамоталары туттулар. Оттон кинилэр салайааччылара Светлана Павловна ситиһиилээх үлэтин иһин икки номинацияҕа грамоталарынан наҕараадаланна.
Анна Захарова.