А.А. Саввин аатынан Чурапчытааҕы этнография уонна история мусуойа РФ Култууратын министиэристибэтин иһинэн «Култуура» национальнай бырайыак чэрчитинэн толору өрөмүөннэннэ.
Чурапчытааҕы түмэл 2022-2023 сылларга «Култуура» национальнай бырайыак сүүмэрдиир куонкуруһугар кыайан, үп көрүллэн аныгы ирдэбилгэ толору эппиэттиир өрөмүөн үлэтэ ыытылынна. Ол курдук, быйыл сэттэ ый устата 434 миэтэрэ иэннээх эбийиэк муостата, истиэнэлэрэ, тутуу ис үрдэ оҥоһулуннулар, түннүктэрэ уларыйдылар, саҥа уот-күөс, ититии ситимэ тардылынна. Үлэни бэдэрээтчит «ПД-Инжиниринг» ХЭТ былааннаммыт кэмигэр хаачыстыбалаахтык толордо.
Саҥардыллыбыт мусуой аһыллыытыгар кэлбит ыалдьыттары Чурапчы далбар хотуттара уруйдуу көрүстүлэр.
Үөрүүлээх тэрээһиҥҥэ улуус баһылыга Степан Саргыдаев, улуус дьокутааттарын сэбиэтин бэрэссэдээтэлэ Яков Оконешников эҕэрдэ тылы эттилэр. Ил Түмэн Бочуотунай грамотатын Чурапчытааҕы түмэл научнай сотруднигар Юрий Толстоуховка уонна «Үтүө суобастаах үлэтин иһин» бочуоттаах бэлиэни үлэ бэтэрээнигэр, суруналыыс Варвара Поповаҕа туттардылар.
СӨ Култуура уонна духуобунай сайдыы миниистирэ Афанасий Ноев эҕэрдэлээн туран, түмэл техническай өттүнэн хааччыллыытыгар 5,3 мөл. суумалаах субсидия сэртипикээтин туттарда. Бу бырагыраама «Дьиэ кэргэн» национальнай бырайыак чэрчитинэн олоххо киирэр. Салгыы «ПД-Инжиниринг» ХЭТ үлэһиттэригэр Махтал суругу туттарда.
Бэлиэ күҥҥэ СӨ Култуура уонна духуобунай сайдыы министиэристибэтэ, Гуманитарнай чинчийии уонна аҕыйах ахсааннаах хотугу омуктар кыһалҕаларын института уонна Чурапчы улууһун дьаһалтата бииргэ үлэлииргэ үс өрүттээх сөбүлэҥи түһэристилэр. Докумуоҥҥа туһааннаах салайааччылар илии баттаатылар.
Саҥардыллыбыт сырдык мусуой устунан экскурсияҕа «Артефакт» бырайыак туһунан билиһиннэрдилэр. «Артефакт» цифровой платформа РФ Култууратын министиэристибэтин иитинэн үлэлиир. Манна музей экспонаттарын QR-кодунан киирэн көрүөххэ сөп. Экспонат ис хоһоонун профессиональнай аудио-гид нууччалыы уонна омук тылынан кэпсиир кыахтаах. Бу бырагыраамаҕа Саха сирин муниципальнай мусуойдарыттан бастакынан Чурапчытааҕы мусуой киирэн, 40 экспонат дааннайа угулунна.
Бу күн Гуманитарнай чинчийии уонна аҕыйах ахсааннаах хотугу омуктар кыһалҕаларын институтун дириэктэрэ Сардана Боякова, СӨ Национальнай бибилэтиэкэтин дириэктэрэ Саргылана Максимова, Ем.Ярославскай аатынан Дьокуускайдааҕы мусуой дириэктэрин солбуйааччы Алексей Ховров, Чурапчы нэһилиэгин баһылыгын социальнай боппуруостарга солбуйааччы Варвара Макарова уо.д.а. кыттыыны ыллылар, эҕэрдэ эгэлгэтин эттилэр уонна наҕараадалары туттардыллар.
Марфа Петрова.