Бүгүн СССР Доруобуйатын харыстабылын туйгуна, РФ Бочуоттаах донора, XX-c үйэ бастыҥ үлэһитэ Мария Эверстова үбүлүөйдээх 90 cааһын томточчу туолла. Бу күн кини аатын Чурапчытааҕы Киин балыыһа Акушер салаатыгар иҥэрдилэр.
Бэлиэ түгэҥҥэ үрдүк категориялаах акушер Мария Гаврильевна видео сибээһинэн холбонно.
Үөрүүлээх дьаһалга улуус баһылыгын социальнай боппуруостарга солбуйааччы Мария Кронникова, улуус бэтэрээннэрин сэбиэтин бэрэссэдээтэлэ Матрена Матвеева, Чурапчы нэһилиэгин баһылыгын социальнай боппуруостарга солбуйааччы Варвара Макарова уонна Мария Эверстова биир идэлээхтэрэ, алтыспыт дьоно-сэргэтэ, аймахтара кыттыыны ыллылар.
Улуус баһылыгын социальнай боппуруостарга солбуйааччы Мария Кронникова Мария Гаврильевнаны эҕэрдэлээн туран, улууска доруобуйа харыстабылын сайдыытыгар, демография тупсуутугар үгүс сыратын, сүҥкэн кылаатын киллэрсибитин бэлиэтээтэ. Кини cаҥа олохтоммут «Чурапчы улууһун Бочуоттаах бэтэрээнэ» үрдүк бэлиэни туттарда.
Мария Гаврильевна Эверстова Биэлсэр уонна акушер оскуолатын 1957 сыллаахха бүтэрэн, Түөйэҕэ биэлсэр уонна акушер пуунугар сэбиэдиссэйинэн анаммыт. Салгыы Одьулуун нэһилиэгэр дьыссаака сэбиэдиссэйинэн үлэлээбит. Онтон Чурапчыга икки сыл оройуоннааҕы доруобуйа харыстабылыгар ийэни, оҕону көмүскүүр отделга биэлсэрдээбит. 1961 сылтан 47 сыл эҥкилэ суох Киин балыыһа Дьахтары төрөтөр салааҕа акушерканан үтүө суобастаахтык үлэлээбит. Мария Гаврильевна бу сыллар усталарыгар улууска 5000-н тахса оҕоҕо күн сирин көрдөрбүт. Оҕону сөпкө көрөргө, аһатарга үгүс дьахтары үөрэппит . «Мария Гаврильевна сүбэлээбитэ, үөрэппитэ», — диэн улууска элбэх ийэ ахтар.
Мария Гаврильевна бэйэтин идэтигэр бэриниилээҕинэн, чиҥ билиитинэн, сатабылынан, түргэн быһаарыытынан, сырдык кэрэ, улахан сүрэхтээҕинэн, сымнаҕас илиилээҕинэн улуус дьонугар-сэргэтигэр киэҥник биллэр. Кинини биир идэлээхтэрэ убаастаан, сүгүрүйэн «Чурапчы доруобуйатын харыстабылын легендата” диэн ааттыыллар.
Улуус ытык кырдьаҕаһа, Чурапчы улууһун Бочуоттаах олохтооҕо Мария Эверстова төрөөбүт күнүгэр кини аатын өр сылларга үлэлээбит тэрилтэтигэр иҥэрбиттэрэ дьоһун бэлэх буолла. Акушер салаатын билиҥҥи үлэһиттэрэ үтүө холобур оҥостон, таһаарыылаахтык үлэлиэхтэрэ диэн эрэнэбит.
Марфа Петрова.