Чурапчытааҕы аграрнай-техническэй кэллиэс элбэх өҥөнү оҥорор уонна эбии идэни биэрэр киинэ 16-тан үөһэ саастаах Чурапчы улууһун олохтоохторун, ыалдьыттарын тиэхэньикэни ыытарга “А” категорияҕа куурус ыытарын туһунан иһитиннэрэр.
Үөрэх ыытыллар сирэ, Чурапчы нэһилиэгин Ленин аатынан уулусса 35/1 нүөмэрдээх, уруккута “Арчы” дьиэтэ буолар. Сиһилии билсэр төлөпүөннэргит: 89142253460, 89679101768 уонна 8(41151) 41-204.
Үөрэх үөрэҕинэн, ол эрэн дьиҥнээх олоххо түөрэ барыта атын буоларын өйдүөх тустаахпыт. Холобура бу мин, 16 саастаах, матасыыкылбын бу саас уулуссаҕа таһааран сүүрдүөхпүн баҕарар уол, дьонум биэрбит 20500 солкуобайдарын кэрэйбэккэбин эрэ, умсугуйан туран үөрэнэбин. Онуоха ГИБДД сотруднига туох диир эбитий?
“Дьиҥ кырдьыгынан эттэххэ, сокуоннай сааһын ситэ туола илик оҕо ханнык баҕарар тырааныспар уруулугар олороро сокуонунан булгуччу бобуллар. Оттон ити ыйытыкка маннык хоруйдуубут, оҕо 16 сааһыгар “А” категорияҕа о.э матасыыкылы ыытар үөрэххэ үөрэнэрэ көҥүллэнэр ол эрэн быраабы ылар эксээмэҥҥэ 17-гэр биирдэ киирэр. Итини таһынан ол матасыыкылы ыытар быраабын 18 сааһын туоллаҕына биирдэ ылар. Онон убаастабыллаах төрөппүттэр үчүгэйдик толкуйданыҥ, оҕолоргут инники дьылҕаларын санаан тураҥҥыт сөптөөх быһаарыныыны ылыныҥ”, — диэн Чурапчытааҕы ГИБДД сотруднига Геяна Иосифовна Родионова быһаарда.
Сэмэн ЖЕНДРИНСКЭЙ