Сарсыҥҥыттан саҕалаан Дьокуускай куоракка волейболга дьахталлар хамаандаларын икки ардыгар улахан чөмпүйэнээт саҕаланар. Бу туһунан СӨ физкултуураҕа уонна маассабай успуорка управлениета иһитиннэрдэ.

Волейбол түһүлгэтэ “Улуу Кыайыы 50 сыла” успуорт дыбарыаһыгар ыытыллыаҕа.

Үрдүкү лиигэ иһин — Нам, Уус Алдан, Мэҥэ Хаҥалас, Чурапчы, Мииринэй, Ньурба, Амма улуустарыттан уонна Дьокуускай куораттан ураты, атын улуустартан дьахталлар хамаандара кэлэн кыталлара былааннанар.

Оонньуулар волейбол бэдэрээссийэтин быраабылатынан барыаҕа итиэннэ икки кыайыыга диэри үс баартыйанан оонньуохтара. Балаһыанньа быһыытынан хамаандаҕа 12 оонньооччу уонна биир бэрэстэбиитэл киириэҕэ. Манна даҕатан эттэххэ, финалга тахсыбыт хамаандалар 2026 сыл сезонугар Үрдүкү лиигэҕэ кыттар быраабы ылыахтара.

Волейболу сэҥээрээчилэр СӨ физкултуураҕа уонна маассабай успуорка управлениетын RuTube-каналынан https://clck.ru/36Zpg6 көрүөхтэрин сөп.

 

Сэмэн ЖЕНДРИНСКЭЙ