Муус устар 12-13 күннэригэр, Чурапчы улууһуттан 8 ыспартысымыан хабылык, хаамыска араас көрүҥэр оонньоотулар. Ол курдук, успуорт улахан көҕүлээччитэ, өрөспүүбүлүкэ 5 төгүллээх чөмпүйүөнэ, Мэҥэ Хаҥалас улууһун үрдүкү тириэньэрэ, куйуурга ойбону алларыыга өрөспүүбүлүкэ 10 төгүллээх чөмпүйүөнэ, аатырбыт анньыыһыт, успуорт бэтэрээнэ Прокопий Андреев сырдык кэриэһигэр өбүгэ төрүт остуолун оонньууларыгар улахан турнир буолан түмүктэннэ.
Манна Чурапчы командатыгар: Елизовета Винокурова, Мария Капрынова, Анна Михайлова, Кэскил Михайлов онтон оҕолорго: Арина Кузьмина, Вика Бельчусова, Эльвира Маркова, Яна Алексеева кытыннылар. Чурапчы улууһун бэрэстэбиитэлин быыытынан Кэскил Михайлов, оҕолор тириэньэрдэринэн Анна Николаева илдьэ сырытта.
Манна даҕатан эттэххэ Прокопйи Андреев аатын күрэхтэһии өрөспүүбүлүкэ халандаарынай былааныгар киирэр. Быйыл икки күн устата 1-кы Тыыллыма нэһилиэгэр, Лоомтука бөһүөлэгэр икки сиринэн Ю.П. Баишев аатынан успуорт саалатыгар уонна С.З.Борисов аатынан орто оскуола баазатыгар турнир үрдүк тэрээһиннээхтик ыытылынна.
Быйылгы күрэххэ барыта холбоон 10 улуустан 64 оонньооччу кытынна. Ол курдук: Дьокуускай, Ньурба, Уус Алдан, Чурапчы, Бүлүү, Үөһээ Бүлүү, Анаабыр, Өлөөн, Горнай, Мэҥэ- Хаҥалас икки хамаанданан күөн көрүстүлэр.
Бастакы күн хаамыска “Күөрэгэй”, “Сулус” көрүҥнэригэр оонньоотулар. Күрэх саастарынан 5 бөлөххө наарданан ыытылынна.
Күрэххэ кэлбит дьону А.М. Алексеев аатынан сынньалаҥ киин үлэһиттэрэ арыылаах алаадьынан уруйдуу көрүстүлэр. Күрэхтэһии үөрүүлээх чааһын сынньалаҥ киин исписэлииһэ В.В. Никифоров аста. Күрэх кылаабынай судьуйата И.П. Максимов, олохтоох оскуола дириэктэрэ К.А. Захаров, успуорт бэтэрээнэ, күрэҕи тэрийсибит В.М. Попов, нэһилиэк дьаһалтатын аатыттан сүрүннүүр исписэлиис Нь.М. Алексеева эҕэрдэ тыллары эттилэр. Прокопий Андреев бэйэтин баҕатынан хабылык, хаамыска оонньуутугар анаан суруллубут өрөгөйүн ырыатынан доҕуһуолланан, ону тэҥэ В.В.Никифоров, Прокопий Константинович сөбүлээн ыллыыр А.М.Алексеев “Таммахтар” диэн ырыатын ыллаан күрэх көҕүн өссө күүркэтэн биэрдэ. “Быйылгы турнирга оонньооччу сааһа эдэримсийбитэ харахха быраҕыллар, бу олус үчүгэй көстүү, ити аата өбүгэ оонньуута кэскиллэнэр буолбут диэн үөрэ санаатыбыт. Оонньуур маастарыстыбалара лаппа үрдээбит”, — диэн сахалыы остуол оонньууларын СӨ успуордун маастара Андрей Деллохов санаатын үллэһиннэ.
Ити курдук икки күннээх күрэх үрдүк таһымҥа ааста: бастакы күн “Сулус”, “Күөрэгэй”оонньууга Анна Михайлова — 1 миэстэ, Кузьмина Арина — 1 миэстэ, Мария Капрынова 2 миэстэ буолары ситистилэр.
Иккис күҥҥэ Арина Кузьмина 3 миэстэ буолла. Түгэнинэн туһанан, остуол оонньуутун бэдэрээссийэтигэр Анатолий Александровка, успуорт управлениятын начаалынньыгар Дьулустан Егоровка, хамаанда улахан махталын биллэрэр.
Сэмэн Жендринскэй