Тохсунньу 26 күнүгэр Дьокуускай куоракка «Самородок» спорт комплексыгар «Рождественский волейбол» диэн доруобуйаларынан хааччахтаах спорт бэтэрээннэрин икки ардыларыгар «Сахаваболга» хамаанданан өрөспүүбүлүкэтээҕи күрэхтэһии буолла. Манна өрөспүүбүлүкэтээҕи ВОИ бэрэссэдээтэлэ Ирина Васильевна Лебедева күрэхтэһээччилэри эҕэрдэлээтэ, ситиһиилэри баҕарда. Уопсайа, түөрт толору хамаанда кытынна, ол курдук: Нам , Чурапчы, Хаҥалас улуустарыттан уонна Дьокуускайтан. Отуттан тахса киһи кытынна. Тыҥааһыннаах киирсиилэр түмүктэринэн Нам улууһа кыайыылааҕынан таҕыста. Оттон Чурапчы улууһа 2-с бириистээх миэстэҕэ тигистэ. Дьокуускай хамаандата 3-с миэстэ буолары ситистэ. Кыайыылаахтар дипломунан, мэтээллэринэн, сыаналаах бириистэринэн наҕараадаланнылар. Ону таһынан «Бастыҥ оонньооччу» анал аат Чурапчы улууһуттан Розалия Даниловаҕа ананна. Оттон эр дьоҥҥо итинник ааты Намтан сылдьар Василий Собакин ылла. Кинилэргэ сыаналаах бэлэхтэри туттардылар.
Бары хамаандалар бэлэмнээхтэрин, түмсүүлээхтэрин көрдөрдүлэр. Кыттыбыт бары дьоммутугар өссө үрдүк ситиһиилэри баҕарабыт.
Саргылана Хоютанова.