Кыайыы Знамята икки күн устата Чурапчы улууһун бары нэһилиэктэригэр сырытта. Нэһилиэктэринэн сылдьыбыт дэлэгээссийэни улуус баһылыгын социальнай боппуруостарга солбуйааччыта Мария Кронникова салайда. Хас биирдии нэһилиэк үрдүк таһымнаахтык бэлэмнэнэн, сэрии кэмин оҕолорун, нэһилиэнньэни, бойобуой дьайыы бэтэрээннэрин уонна оҕолору түмэн көрүстүлэр. Онон улууспут Кыайыы Знамятын историятын, биһиги эһэлэрбит, эбэлэрбит хорсун олохторо билигин биһиги дойдубут охсуһар охсуһуутугар, хапсыһар хапсыһыытыгар сүҥкэн оруоллааҕын кэнчээри ыччаппытыгар тиэрдэр соругун толордо.
Бүгүн Таатта кыраныыссатыгар улуус баһылыга Степан Саргыдаев салайааччылаах дэлэгээссийэ Кыайыы Знамятын таатталарга туттарда.
Таатта баһылыгын э.т. Руслан Захаров: “Биһиги Тааттабытыттан 1758 буойун Ийэ дойдуларын Гитлер хаанымсах дьайыттан көмүскүү барбыттара. Кинилэртэн баара эрэ 931 киһи эргиллэн кэлбиттэрэ. 827 хоодуот буойун кыргыс толоонугар охтубуттара. Онон биһиги дьоллоох көҥүл олохпут иһин бэйэлэрин олохторун толук уурбут дьоммутун кэриэстиир, үйэтитэр, кинилэргэ сүгүрүйэр ытык иэстээхпит”, — диэн эттэ.
Тыл эппиттэр ортолоругар Кыһыл болуоссакка ыытыллыбыт Улуу Кыайыы парадын кыттыылааҕа Павел Слепцов төрөппүт уола, сэрии сылын оҕото Иван Слепцов баар. Кини оччолорго 4 саастааҕын, сэрии кэмин ыар сылларын хайдах өйдүүрүн, аҕата Кыайыы парадыгар кыттыбытын ахтан-санаан ааста.
Кыайыы Знамята икки күн устата Таатта улууһугар, салгыы Томпоҕо айанныаҕа.
“Бары бииргэ – Кыайыыга” диэн девизтээх эстафета СӨ Ил Дархан Айсен Николаев дьаһалынан ыытыллар. Сэрии толоонугар охтубут, сураҕа суох сүппүт саха ньургун буойуттарыгар, кыайыы кынаттанан төннүбүттэргэ, тыылга фроҥҥа үлэлээбит, кыайыыны уһансыбыт ытык дьоммут кэриэстэригэр сүгүрүйэн ананар эстафета буолар.
Елена Макаринская