Бүгүн Чурапчы улууһун бааһынай хаһаайыстыбалара уонна Бахсы нэһилиэгин олохтоохторо, байыаннай госпиталга эмтэнэр саллааттарга анаан хомуйбут көмөлөрүн ыыттылар.
Үтүө дьыаланы Анжелика Неустроева салайааччылаах улуустааҕы тыа хаһаайыстыбатын салалтата сүрүннээтэ. Биир туонна кэриҥэ эриллибит, кырбаммыт эти, уонтан тахса куул ыһаарыламмыт балыгы, куһу, арыыны, барыанньаны, отонтон сиробу тиэртилэр.
«Саллааттары өйөөбүт бааһынай хаһаайыстыбаларга, аһы астыырга көмөлөспүт Чурапчы нэһилиэгин оскуолаларыгар, физическэй култуура институтугар, Чурапчытааҕы колледжка, олохтоох инициативалары өйүүр агентствоҕа, урбаанньыт Валерий Семеновка саллааттар уонна кинилэр дьиэ кэргэттэрин ааттарыттан махталбытын тириэрдэбит. Дьон бэйэтэ ис сүрэҕиттэн көмөлөһөр. Ол уолаттары олус долгутар уонна үөрдэр. Кинилэр биһигини күүтэллэр, кэтэһэллэр» — диэн СӨ Кэлим сүрүннүүр киин эпэрэтиибинэй штабын чилиэнэ, саллаат ийэтэ Светлана Диодорова-Лаврентьева эттэ.
Людмила Горохова
