Чурапчыга үүммүт дьылы көрсө “Чэбдиктэр” сөтүөлэрэ саҕаланна (Фоторепортаж)

Чурапчы улууһугар Афанасий Дмитриевич Дорофеев төрүттээбит тымныыны бэйэҕэ киллэрэн таһаарыы ньыматынан  “Чэбдик” доруобуйаны бөҕөргөтүнэр түмсүү үлэлээбитэ 30-ча сыл буолан эрэр. Бу сыллар усталарыгар “Чэбдик”-тэр Саха сирин ону ааһан соҕуруу дойду олохтоохторун кытары бэйэлэрин баай уопуттарын үллэстэллэр. Бу аҕыйах сыллааҕыта, Тымныы полюһунан биллибит Өймөкөөн улууһугар тиийэннэр -57С-ка сөтүөлээн көрдөбүттэрэ.

Түмсүү күн бүгүн 20-чэ чилиэннээх, бүгүн эмиэ мустаннар, Чурапчы нэһилиэгин килбэйэр киинигэр, Иван Кандинскай аатынан “Айыллаан” КК аннынан ойбон аллараннар,

2025 үүммүт дьылга бастакыларын тымныы ууга сөтүөлүүр ньымаларын өссө төгүл көрдөрдүлэр, сиһилии кэпсээтилэр.

“Биһиги сүрүннээр оҕонньорбут үөрэҕэр тирэҕирэбит, тэтими ыһыктыбакка ол ону харыстыырга дьулуһабыт. Манна Сылаҥтан, Кытаанахтан, Хатылыттан, Чакыртан тиийэ кэлэннэр хас өрөбүл күн аайы кэлэннэр доруобуйаларын бөҕөргөтүнэллэр. Сүрүн кистэлэҥэ диэн тымныыны киллэрэн аһарыныы буолар, биллэн туран тымныыга тоҥобут, ардыгар абааһы да көрөбүт ол эрэн ити ньыма нөҥүө куһаҕан тыыннары, ойбоннорбутун, мас сыыһын ыраастанабыт. Тымныы кэнниттэн киһи көһүйбэт, букатын абытайдаах хамсаныылары хамсанаҕын, туох даҕаны буолбаккын, төттөрүтүн сэргэхсийэҕин. Аны тымныыҥ сөпкө таҕыстаҕына холкутуйан, нукаай адьас үчүгэй да үчүгэй турукка киирэҕин. Ити дьарыгын биир нэдиэлэ устата сылдьар, ол аата сэрээттэнэбит. Итини барытын биһиги учууталбыт Афанасий Дмитриевич дакаастаан турар”, — диэн оҕонньор үөрэҕин утумнааччы, бу аҕыйах күнүнэн “Өймөкөөн – тымныы полюһа” экстремальнай сүүрүүгэ кытта бараары сылдьар Таппааһай уола Мындыр Куйаар сэһэргиир.

Нэдиэлэ кэриҥэ тымныылар түһэннэр бүгүн эмискэччи -34С кыраадыһы көрдөрөн букатын саас кэлбитин курдук буолла. Ол да буоллар син биир тымныы, кыһын аата кыһын. Түмсүү чилиэттэрэ биир-биир киирэннэр ойбоҥҥо сөтүөлээн, умсан таҕыстылар.

Кинилэри көрө туран киһи: “Ычча да ычча, уччуу-учча-аа!!! Итиннэ киирдэххэ хабах, бүөр бүтэр, тута ойоҕостотон балыыһаҕа киириллэр”, — диэн санаа элэстэнэр.

Ол кэнниттэн Иван Кандинскай аатынан “Айыллаан” КК-гэр кинилэргэ анаммыт кыракый хоско киирэннэр тымныыны таһаарынан сүрүн үлэлэригэр кэтээн көрдүбүт.

“Тымныы ууга киирдэххинэ букатын тыһыынчанан инньэ кэйиэлиирин тэҥэ ыарыылаах буолар. Аны тымныыттан тахсаат даҕаны күүскэ хамсанар сатаммат, тымырдарын быһыта барыахтарын сөп. Ол инниттэн кыра-кыралаан хамнанан бараҥҥын дьэ күүскэ хамсанаҥҥын искиттэн тымныыгын таһаарыныахтааххын. Дьиктитэ диэн баар, тымныы ууга киирэн таҕыстаххына имигэһиҥ дьэ киирэр, онтон ирэн киирэн бардыҥ даҕаны ол онтукайыҥ тохтуур”, — диэн “Чэбдик” клубка 2005 сыллаахтан дьарыктанар, РФ Бочуоттаах донора Николай Николаевич Новгородов быһаарар.

Анал хамнаныыларынан ону таһынан бэйэ-бэйэни илбийэн бэрт судургутук, түргэнник чөллөрүгэр түһэллэрин илэ харахпытынан көрөн итэҕэйдибит.

 

  Сэмэн Жендринскэй. Ааптар хаартыскаҕа түһэриитэ