Чурапчыга «Ытык сүбэ» түмсүү эдэрдэргэ үтүө холобур буолар

Чурапчы нэһилиэгин дьаһалтатын иһинэн үлэлиир  «Ытык сүбэ» чилиэннэрэ олорор түөлбэлэрин – киин бөһүөлэк ыраас, чэбдик буоларыгар  кыһаллаллар. Итиннэ ананар араас тэрээһиннэргэ, дьаһалларга  көхтөөхтүк кытталлар, тэрийсэллэр.

Ол курдук, мастары үүннэрэргэ анаммыт тимир күрүөлэри (беседкалары) хас да сиргэ туруордулар, кырааскалаатылар. Бэйэлэрин тиэхиньикэлэринэн  хатыҥ, тиит мастары аҕалан олортулар. Хатан-кууран хаалбаттарын туһугар уу куталлар, ыраастыыллар.

Самаан сайын ыһыаҕын көрсөр стадиону көрүүгэ-харайыыга эмиэ субуотунньугунан көмөлөһөллөр. Бэс ыйын 17 күнүгэр ыһыахха анаан анньыллыбыт чэчирдэри хомуйдулар.

Маннык тэрээһиннээх, түмсүүлээх буоланнар, ааспыт сыл түмүгүнэн  «Чурапчы нэһилиэгин бастыҥ уопсастыбаннай тэрилтэтэ» аат хаһаайыннарынан буолбуттара.

Ыччаттарбыт кинилэр холобурдарын батыһан, төрүт түөлбэлэрин ыраастык тутарга, тупсарарга, харыстабыллаахтык сыһыаннаһарга дьулуһуохтаахтар.

Алексей Слепцов.