“Үс төгүл үс” успуорт национальнай көрүҥнэригэр улуус чөмпүйэнээтэ бүгүн Александр Федотов аатынан успуорт уораҕайыгар саҕаланна. Күрэхтэһии, СӨ физкултуурунай хамсааһын 100 итиэннэ СССР физическэй култуураҕа туйгуна, Саха АССР култууратын үтүөлээх үлэһитэ, “Урожай” ДСО Бочуоттаах чилиэнэ Афанасий Софронов төрөөбүтэ 95 сылыгар ананан ыытыллар.
Чөмпүйэнээккэ барыта холбоон 14 ыспарсымыан суруттарда, билиһиннэрэр эбит буоллахха Алаҕар нэһилиэгиттэн Айсен Елисеев, Арыылаах нэһилиэгиттэн Андрей Пугачев, Бахсы нэһилиэгиттэн Роберт Тарабукин, Болтоҥо нэһилиэгиттэн Иннокентий Попов, Болугур нэһилиэгиттэн Юрий Диодоров, Хоптоҕо нэһилиэгиттэн Георгий Пугачев, Мугудай нэһилиэгиттэн Константин Евсеев, Соловьев нэһилиэгиттэн Михаил Соловьев, Сылаҥ нэһилиэгиттэн Юрий Семенов, Төлөй нэһилиэгиттэн Юрий Копырин, Хадаар нэһилиэгиттэн Станислав Андросов, Хатылы нэһилиэгиттэн Рустам Барашков, Кытаанах нэһилиэгиттэн Петр Бабиченко, Чурапчы нэһилиэгиттэн Владимир Арьянов эрбии тииһин курдук эгил-тэгил эриһиэхтэрэ.
Бүгүн, бастакы күҥҥэ, сарсыарда 9 чаастан мандаат саҕаланан, “Үс төгүл үс” сахалыы ыстаҥаҕа, тутум эргииригэр, мас тардыһыытыгар күрэхтэһиилэр буолан түмүктэннилэр. Күрэхтэһии үөрүүлээх чааһыгар Чурапчы улууһун баһылыга Степан Саргыдаев: “Бүгүҥҥү чөмпүйэнээккэ бачча элбэх ыспарсымыан ыччаттарбыт кэлэҥҥит кыттыыны ыларгыт, бу буолар нэһилиэккит успуорка интэриэһэ, бу буолар оройуоммутугар ыспартыыбынай хамсааһын үтүө түмүгэ. Онон барыгытыгар ситиһиилэри, бастыҥ көрдөрүүлэри баҕарабын”, — диэн эттэ.
Үс төгүл үс
1 миэстэ – Михаил Соловьев (Мырыла);
2 миэстэ – Петр Бабиченко (Кытаанах);
3 миэстэ – Андрей Пугачев (Арыылаах);
4 миэстэ – Роберт Тарабукин (Бахсы);
5 миэстэ – Георгий Пугачев (Дириҥ).
Тутум эргиир
1 миэстэ – Юрий Копырин (Төлөй);
2 миэстэ – Станислав Андросов (Хадаар);
3 миэстэ – Айсен Елисеев (Алаҕар);
4 миэстэ – Роберт Тарабукин (Бахсы);
5 миэстэ – Андрей Пугачев (Арыылаах).
Мас тардыһыыта
1 миэстэ – Станислав Андросов (Хадаар);
2 миэстэ – Андрей Пугачев (Арыылаах);
3 миэстэ – Иннокентий Попов (Болтоҥо);
4 миэстэ – Юрий Копырин (Төлөй);
5 миэстэ – Юрий Семенов (Сылаҥ).
Бастакы күн түмүгүнэн
1 миэстэ – Андрей Пугачев (Арыылаа);
2 миэстэ – Станислав Андросов (Хадаар);
3 миэстэ – Юрий Копырин (Төлөй).
Сарсын сарсыарда 9 чааска, Чурапчытааҕы судаарыстыбаннай физическэй култуураҕа уонна успуорка үнүстүүтүн манеһыгар 400 миэтэрэ уһуҥҥа сүүрүөхтэрэ онтон салгыы Александр Федотов аатынан успуорт уораҕайыгар кэлэннэр оҕунан ытыыга, хапсаҕайга, ыараханы көтөҕүүгэ күрэхтэһиэхтэрэ. Киэһэ 17 чаастан кыайыылаахтары наҕараадалааһын сиэрэ-туома ыытыллыаҕа.
Сэмэн Жендринскэй