Профсойуус бэрэссэдээтэлэ Егор Давыдов 2019 сыллаахтан туох үлэ-хамнас ыытыллыбытын туһунан дакылааты оҥордо. Быраабы көмүскээһин, куонкурустарга кыттыы, сэминээрдэргэ кыттыы уонна тэрийии, култуурунай-маассабай үлэ, үлэ харыстабылыгар, сынньалаҥҥа, олорор-үлэлиир усулуобуйаны тупсарыы, о.д.а. хайысхаларга үлэ былааннаахтык барбытын эттэ.
«Отчуоттуур бу сылбыт барыта үчүгэйдик, тэрээһиннээхтик, сыалбытын-сорукпутун толордубут диэн этэр кыахпыт суох. Итэҕэс үлэ, ситэ быһаарыллыбатах боппуруостар, туруорсуулар, кыһалҕалар элбэхтэр. Ол курдук, дакылаакка ыйыллыбыт ыччат сэбиэтин, үлэ харыстабылын үлэлэригэр быһаарыллыбатах проблемалар билигин да баалларын учуоттаан туран, инникитин үлэ биэрээччини кытта бииргэ үлэлээһин сыһыаннаһыыларын өссө тэнитэн үлэлиир эрэйиллэр. Бу кэлээри турар 2025 сыл Улуу Кыайыы үбүлүөйдээх 80 сыла буоларынан, онно анаммыт тэрээһин үлэлэр саҕаланнылар. Бары уһуйаан, оскуола, эбии үөрэхтээһин кэлэктииптэрэ кэлэр сылы түмсүүлээхтик, дьоһуннаахтык көрсүөхтэрэ диэн эрэнэбин. Бииргэ үлэлэһэн кэлбит профком бэрэссэдээтэллэригэр, уһуйаан,оскуола, эбии үөрэхтээһин, үөрэх салалтатын салайааччыларыгар, нэһилиэк баһылыктарыгар, улуус салалтатыгар махталбытын биллэрэбит”, — диэн бэрэссэдээтэл Егор Давыдов кэпсиир.
Улуус баһылыга Степан Саргыдаев улахан тэрилтэлэриттэн биирдэстэрэ буолалларын этэн туран, оҕону иитии- үөрэтии үлэтин таһынан уопсастыбаннай үлэҕэ, улуус ыытар дьаһалларыгар туора турбакка, көхтөөх кыттыыны ылалларын иһин махтанна. С.К. Макаров аатынан Чурапчытааҕы гимназия саха тылын учууталыгар Сардана Гоголеваҕа түөскэ анньыллар бэлиэлээх бочуотунай грамотаны, “Березка” уһуйаан иитээччитигэр Анастасия Седалищеваҕа махтал суругу туттарда.
Санатан эттэххэ, профсойуус састаабыгар 45 профсойуус тэрилтэтэ, ол иһигэр үөрэх салалтата, 20 оскуола, 16 уһуйаан, 3 эбии үөрэхтээһин тэрилтэтэ, 5 оскуола-сад киирэллэр. Учуокка барыта 1930 үлэһит баар.
Елена Макаринская