Бүгүн күн устата ЧГИФКСИ базатыгар араас хайысхаларынан былаһааккалар үлэлииллэр. Күн бастакы аҥаарыгар үс былаһаакка үлэлээтэ.
“Двигательная активность школьников, как способ повышения качества образования обучающихся” хайысхаҕа оскуола дириэктэрдэрэ, физкултуура учууталлара уонна тренердэр кыттыыны ыллылар. Кинилэр үөрэнээччи эт-хаан өттүнэн сайдыылаах буоларыгар туох-ханнык үлэ барыахтааҕар, билигин туох кыаллыбакка турарыгар тохтоотулар.
“С.А. Новгородов аатынан оскуолаҕа 1200 оҕо үөрэнэр. Тыа оскуолаларыгар аҕыйах оҕону барытын хабар кыаллар эбит буоллаҕына, биһиэхэ арыый уустуктардаах. ДЮСШ баар буолан, оҕолорбут бары кэриэтэ дьарыктаах курдуктар. Тренер уонна физкултуура учуутала диэн муора уонна халлаан кэриэтэ. Тренер үчүгэй, талааннаах оҕону талан дьарыктыыр. Оттон учууталлар биһиги мөлтөх оҕону дьарыктаан сайыннарыахтаахпыт. Мөлтөх оҕо доруобуйатын, физическэй туругун сайыннарыыга ылсыахтаахпыт. ГТО нуорматын оҕолор бары туттаралларын ситиһиэхтээхпит. Итинник гымматахпытына, оҕолорбут доруобуйалара айгырыыр кутталлаах. Онуоха иккилии эрэ чаас бэриллэрэ биһигини харгыстыыр. Уруккубут курдук үс чааспытын киллэрэллэрэ буоллар”, — физкултуура учуутала Владислав Кривошапкин диэн санаатын эттэ.
“Формирование культуры здоровья у детей раннего и дошкольного возраста” хайысхаҕа уһуйаан сэбиэдиссэйдэрэ, иитээччилэр, эт-хаан өттүнэн сайыннарааччылар уонна медүлэһиттэр кытыннылар. “Мичил” уһуйаан сэбиэдиссэйэ Марианна Яковлева сөптөөх кэпсэтии тахсыбытын бэлиэтээтэ, оҕо аһылыгар болҕомтону уурар наадатын эттэ, олох кыра саастаах оҕолор менюлара эмиэ анаан оҥоһуллуохтааҕын ыйда.
“Актуальные вопросы оздоровления взрослого населения посредством физкультурно-оздоровительной деятельности” хайысхаҕа Чурапчы олохтоохторун доруобуйаларын уонна олохторун хаачыстыбатын тупсарар сыалтан күннэтэ физкултуурунай-чэбдигирдэр дьарыктарга сылдьалларын ситиһэр туһунан кэпсэттилэр. Манна хаалыктаах хаамыынан, йоганан, о.д.а дьарыктанааччылар кэлэн, бэйэлэрин көрүүлэрин эттилэр, санааларын атастастылар.
Елена Макаринская