Чурапчыга “Үөрэх эйгэтигэр оҕону тиһиктээхтик иитии” диэн улуустааҕы үөрэх эйгэтин үлэһиттэригэр анаммыт балаҕан ыйынааҕы сүбэ мунньах буолла. Сарсыарда Степан Макаров аатынан Чурапчытааҕы гимназияҕа үөрэх тэрилтэлэрин салайааччылара, учууталлар уонна иитээччилэр 10 былаһаакканан арахсан үлэлээтилэр.
Манна саҥа үөрэх дьылыгар үөрэхтээһин систиэмэтигэр киирбит саҥа уларыйыылары, былааннары билсии, оҕону иитиигэ уонна үөрэтиигэ тирээн турар проблемалары быһаарсыы сорук быһыытынан турда. Онуоха былаһааккаларынан үөрэх, иитии уонна үөрэхтээһиҥҥэ цифровизация, каадырдары кытта үлэ, эбии үөрэхтээһиҥҥэ, иитиигэ саҥа философиялары билиһиннэрэр о.д.а. хайысхалаах салаалар үлэлээтилэр.
Педагогтар хайысхаларынан ыытыллыбыт былаһааккаларга сылдьан, оҕону иитиигэ-үөрэтиигэ, оҕо дьоҕурун сайыннарыыга, сиэр-майгы өттүнэн сатарыйбакка, олоҕор таба суолу булунарыгар туһуламмыт саҥа уларыйыылары билсэн үлэригэр-хамнастарыгар туһаныахтара, бэйэ-бэйэлэрин кытта уопут, санаа атастаһан тарҕастылар.
Күн иккис аҥарыгар, “Айылгы” оройуоннааҕы НАДь-гэр пленарнай мунньах буолла. Манна “Чурапчы улууһа” МТ баһылыга Степан Саргыдаев, Чурапчы улууһун үөрэххэ управлениетын начаалынньыга Юрий Посельскай, СӨ үөрэххэ министиэристибэтигэ кэтээн көрүү уонна хонтуруол департаменын салайааччыта Константин Чичигинаров, Дьокуускайдааҕы “Оҕо саас сирдьиттэрэ” тирэх киин салайааччыта Нюргуяна Макарова, “Бастакылар хамсааһыннара” ыччат уонна оҕо хамсааһынын уопсастыбаннай-судаарыстыбаннай Бүтүн Арассыыйатааҕы отделение Сэбиэтин бэрэссэдээтэлин солбуйааччы Александр Кузьмин уопсай иһитиннэриилэри оҥордулар.
2024-2025 сыллааҕы үөрэх дьылыгар улууспут оскуолаларыгар, уһуйааннарыгар саҥардыы үлэлии кэлбит исписэлиистэри билиһиннэрдилэр.
Мунньах түмүктүүр чааһыгар үөрэх эйгэтин араас салааларын үлэһиттэригэр наҕараадалары туттардылар, ол курдук “РФ үөрэҕин Бочуоттаах үлэһитэ” бэлиэнэн: Галина Аммосова (Кытаанах), Прасковья Игнатьева (Чурапчы), Дмитрий Илларионов (Чурапчы), Нюргуяна Петрова (Дириҥ), Елена Попова (Хатылы), Саргылана Протодьяконова (Алаҕар), Анна Федулова (Хайахсыт), Петр Феофанов (Чурапчы), Прасковья Местникова (Түөйэ), Моника Петрова (Чурапчы), Саргылана Новгородова (Чурапчы).
“РФ оҕолорун уонна ыччатын иитэр-үөрэтэр эйгэтин Бочуоттаах үлэһитэ” – Любовь Филиппова (Хайахсыт).
РФ үөрэҕин министиэристибэтин Бочуотунай грамотатынан Любовь Пермякова (Чурапчы), Николай Романов (Чурапчы) наҕараадаланнылар.
“Саха сирин эрэлэ” бэлиэнэн – Анастасия Нестерова (Чурапчы).
“Бастыҥнар хамсааһыннара” эрэгийиэннээҕи отделениетын Махтал суруга – Юрий Посельскайга (Чурапчы), Евгения Чичигинароваҕа (Чурапчы), Евгения Гороховаҕа (Чурапчы) туттарылынна.
“Улуус үөрэҕин сайдыытыгар кылаатын иһин” үрүҥ көмүс бэлиэнэн – Вячеслав Яковлев (Кытаанах) наҕараадаланна.
“Далаһа” үрүҥ көмүс бэлиэни – Иван Чиркоев (Мырыла) тутта.
Үөрэх управлениетын Бочуотунай грамоталарынан Кыдаана Екечьямова (Чурапчы), Ульяна Попова (Мугудай), Александра Куличкина (Чурапчы), Валентина Максимова (Алаҕар), Вячеслав Яковлев (Кытаанах), Иннокентий Бекянов (Одьулуун) наҕараадаланнылар.
Сэмэн Жендринскэй. Ааптар хаартыскаҕа түһэриитэ