Олунньу 3 күнүгэр Чурапчытааҕы физкултуура уонна спорт института тэриллибитэ үбүлүөйдээх 25 сылын туолла. Манна сөп түбэһиннэрэн итиэннэ Устудьуон күнүн декадатын чэрчитинэн институт базатыгар ыччакка «Бииргэ» коммунарскай сбор буолла.
«1999 сыллаахха СӨ бастакы президенэ Михаил Николаев институт аһылларын туһунан 672 нүөмэрдээх дьаһалын таһаарбыта. Ол иһин бу күн, олунньу 3 күнүгэр устудьуоннарбытыгар аналлаах тэрээһини тэрийдибит. Коммунарскай сбор сылын аайы оскуолаларга ыытыллааччы. Онон быйыл оҕолору устудьуоннары кытта ситимнээн биэрдибит. Ол курдук, улуус оскуолаларын 9-11 кылаас үөрэнээччилэрин, орто анал үөрэх устудьуоннарын ыҥырдыбыт», — диэн ыччат бэлиитикэтигэр уонна спорт, иитии үлэтигэр проректор Галина Алексеева билиһиннэрдэ.
Тэрээһин үөрүүлээх чааһын Саха сирин биир бастыҥ ыытааччыта Ньургустаан Николаев уонна Чурапчы көхтөөх ыччатта Кэскил Николаев иилээн-саҕалаан ыыттылар. Киэһэни эстрада тыйаатырын артыыһа Умсуура эньиэргийэлээх ырыатынан киэргэттэ.
Институт төрөөбүт күнүнэн ректор Иннокентий Готовцев, институт президена, бастакы ректора Михаил Гуляев, бастакы выпускниктар ааттарыттан преподаватель Светлана Гуляева, улуустааҕы ыччат дьыалатын исписэлииһэ Александра Хомус уонна федеральнай «Бастыҥнар хамсааһыннарын» Чурапчытааҕы салаатын салайааччыта Тимур Смирников эҕэрдэлээтилэр.
25 сыл устата институттан өрөспүүбүлүкэ, улуус киэн туттар бастыҥ ыспарсымыаннара, преподавателлэрэ, учуонайдара иитиллэн тахсыбыттара. Күн бүгүн выпускниктар төрөөбүт дойдуларын сайдыытыгар бэриниилээхтик, үтүө суобастаахтык үлэлииллэр. Кинилэр истэригэр педагогтар, орто уонна спортивнай оскуола дириэктэрдэрэ, нэһилиэк баһылыктара, тэрилтэ салайааччылара бааллар. Маннык тыа сиригэр турар үрдүк үөрэх кыһата Арассыыйа үрдүнэн соҕотох. Онон оҕолор атын сиргэ барбакка, олорор улуустарыгар үрдүк үөрэх ылаллара, ону кытта тэҥҥэ духуобунай, сиэр-майгы өттүнэн эргиччи сайдыылаах үлэһит буолан тахсалларыгар табыгастаах.
Коммунарскай сборга барыта 200-тэн тахса ыччат кытынна. Бастакы, бэйэни билиһиннэрии түһүмэх кэнниттэн, 15 хамаандаҕа арахсан, 12 станциялаах квест-оонньууну аастылар. Салгыы түүннэри спортивнай уонна «Бэһиэлэй старт» күрэхтэргэ күөн көрүстүлэр, киинэ көрдүлэр. Маны сэргэ сарсыардааҥҥа диэри добровольчествоҕа, байыаннай, патриотическай хайысхаҕа, буулдьанан ытыыга, уруһуйга, гитараҕа уо.д.а. хайысхаларга маастар кылаастар, уоттаах-күөстээх дискотека ыытылыннылар.
Оттон дэлэгээссийэ салайааччыларыгар бырайыак үлэтигэр уонна үрдүк үөрэх кыһатыгар туттарсарга эбии баал ылыытыгар сэминээр буолла.
Петр Соловьев, институт устудьуоннарын сэбиэтин бэрэссэдээтэлэ.
— Билигин сэбиэппитигэр 20-тэн тахса устудьуон баар. Сорох оҕолорбут выезка сылдьаллар. Ону таһынан 15 волонтер уонна хас биирдии спорт көрүҥүттэн 5-тии-6-лыы бэрэстэбиитэл бааллар.
Институппутугар «Боотур» патриотическай кулууп ситиһиилээхтик үлэлиир. Уопсайа 14 устудьуон дьарыктанар. Кинилэр Арассыыйатааҕы куонкурустарга кыттан, бириистээх миэстэҕэ үгүстүк тиксэллэр.
Быйыл үбүлөйдээх сылынан үөрэхпит кыһатыгар сыл устата араас хабааннаах тэрээһиннэр былааннаналлар. Маны тэҥэ устудьуоннар спорка, наукаҕа уонна волонтердар хамсааһыннарыгар 25 улахан ситиһиини оҥоруохтаахпыт. Ону таһынан тапталлаах институпптугар Гимн суруйан бэлэхтииргэ эрэннэрэбит.
Марфа Петрова.