Алтынньы 26 күнүгэр Чурапчы улууһунааҕы оҕону-ыччаты успуорка эбии үөрэхтээһин оскуолатын иһинэн “Успуорт үрдэлэ” диэн адаптивнай үлэҕэ ыспартыыбынай былаһаакка арыллыытын үөрүүлээх чааһа буолла.
Бу бырайыак бэрисидьиэн гранын пуондатын кыайыылааҕынан тахсан “Дьулус” пуонда өйөбүлүнэн үлэтин салгыыр. Эт-хаан өттүнэн эрчийэр былаһаакка доруобуйаларынан хааччахтаах итиэннэ инбэлиит оҕолор дьарыктаналларыгар төһүү күүс буолара саарбаҕа суох.
Тэрээһиҥҥэ биир үгүс оҕолор төрөппүттэрин кытары кыттыыны ыллылар. Үөрүүлээх чааска Чурапчы улууһун адаптивнай успуорт көрүҥнэрин салайааччыта Иннокентий Матвеев эҕэрдэ тыл эттэ итиэннэ өрөспүүбүлүкэтээҕи адаптивнай успуорт көрүҥнэрин ыспартакыйаадатын кыттааччыларыгар: призер Күндүүнэ Кычкинаҕа, Мичийээнэ Павловаҕа, Дима Сивцевка махтал суруктары туттарда. Улуустааҕы социальнай харалта аатыттан Ольга Баишева, оҕону-ыччаты успуорка эбии үөрэхтээһин оскуолатын дириэктэрин солбуйааччы Семен Артемьев тыл эттилэр.
Бырайыак кыттыылаахтара, оҕо ускуустубатын оскуолатын иитиллээччилэрэ Данил Ильинов уонна Булат Протодьяконов (сал. Т.А. Петрова) эҕэрдэ нүөмэр көрдөрдүлэр.
Тэрээһин икки чааһыгар бырайыак писхологтара Прасковья Явловская уонна Юлия Собакина оҕолорго, төрөппүттэргэ анаан оонньуулары, писхологическай трениннэри тэрийэн ыыттылар. Түмүккэ оҕолорго анаан фуршет буолла, тэрийээччилэр түгэнинэн туһанан төрөппүттэргэ, волонтердарга улахан махталларын биллэрэллэр.
Сэмэн Жендринскэй