Үөрэхтээһин эйгэтигэр сайдыы саҥа хайысхаларын тобулуу — кэм ирдэбилэ буолла. «Улыбка» тутулуга суох тэрилтэ 2021 cыллаахха тэриллибитэ.
Төрүттээччилэр Екатерина Иванова, Ньургуйаана Иванов эбии үөрэхтээһин эйгэтигэр өҥөнү оҥорууга сыал-сорук туруоран, араас хайысхаларынан үлэ ыытыллан саҕаламмыта. Ааспыт сылга «Төрөөбүт төрүт тылы сөргүтүү, тыл баайын сайыннарыы» хайысханан «Анимационный кластер как современная практика популяризации родного языка» диэн бырайыагы торумнаан, Ил Дархан гранын ылары ситистибит.
Бырайыагы олоххо киллэрии икки түһүмэхтэн турар, маҥнайгытынан, тохсунньуттан ыам ыйыгар диэри ойуулугу оҥорор сатабыллаах дьону түмэн, биэс араас бырагыраамманан сүүс баҕалаах ыччаттары, иитээччилэри, учууталлары уһуйуу тэрилиннэ. Ол курдук, өрөспүүбүлүкэҕэ сахалыы ойуулук сайдыытыгар биллэр-көстөр суолаах-иистээх, үгүс сыраларын уурбут дьон үөрэттилэр. Анна Алексеевна Слепцова-Шамаева — Adobe Animate, Николай Олегович Павлов — Anime Studio Pro, Ньургун Егорович Спиридонов — Blender, «Улыбка» уһуйаан педагогтара Слепцова Анастасия Ивановна — Animaker, Николаева Семерина Семеновна — Stop-motion программалары биирдии ый устата сатабылларын үллэһиннилэр. Ыытыллыбыт үлэ сахалыы ойуулук элбии-кэҥии турарыгар, баҕалаахтар сатабылларын сайыннаралларыгар төһүү буоллар диэн баҕалаахпыт.
Иккис түһүмэххэ өс хоһоонунан байытыллыбыт «Сылгы төбөтүн саҕа көмүскэ тугу атастаһыахха сөбүй» норуот остуоруйата ойуулук буолан таҕыста. Ойуулук дьоруойдарын саҥаларын «Улыбка» уһуйаан үлэһиттэрэ толордулар, сүрүн дьоруой саҥатын уһуйааммыт выпускнига Чаҕыл Посельскай аахта, уһун тиэкиһи чуолкайдык, лоп-бааччы толорбута астыннарар. Ону таһынан Чурапчытааҕы Семен Новгородов аатынан орто оскуола 3-с кылааһын үөрэнээччитэ Дьулуур Платонов куолаһын араастаан уларытан, хас да киһи оруолун толорон силикпитин ситэрдэ. Төрөппүттэригэр Аина, Дмитрий Посельскайдарга, Айыына Платоноваҕа өйөбүлгүт иһин махтанабыт. Ойуулугу Анна Слепцова –Шамаева оҥорон, таҥан таһаарда, сценарийы Мария Саввина суруйда. Өйөбүл буолбут тэрилтэбитигэр, дьоруойдар саҥаларын устан, тыас-уус киллэрэн киэргэтэн биэрбитигэр, Чурапчытааҕы “Айылгы” норуот айымньытын дьиэтин коллективыгар, чуолаан Гаврил Лыткиҥҥа барҕа махталбытын тиэрдэбит.
Кырачаан оҕолорбут ойуулук көмөтүнэн, өс хоһоон суолтатын өйдөөн, төрөөбүт төрүт тылбыт баайын, сүмэтин билсэн, иҥэринэ улаатыахтара диэн эрэнэбит.
Ойуулугу бу ссыылканан киирэн көрүөххүтүн сөп:
https://youtu.be/1Hi3GOBCG4Y?si=e8AtKhw3F4tUqS8M
Мария Саввина – “Улыбка” уһуйаан эбии үөрэхтээһинин педагога
Бэлэмнээтэ Сэмэн Жендринскэй