Олохтоохтор сүрүннээн доруобуйа харыстабылыгар, тыа хаһаайыстыбатын боппуруостарыгар, үөрэх эйгэтигэр, олох-дьаһах тэрилтэлэригэр үгүс ыйытыыны биэрдилэр. Маныаха бөһүөлэк иһинээҕи биэрэктэри бөҕөргөтүү, уопсай дьиэлэр толору хааччыллыыларын боппуруоһа ордук долгутар.
Ол курдук, Мурун Тыымпыйа олохтооҕо Валентина Карсанаева бу түөлбэҕэ кытылы бөҕөргөтүүгэ туох үлэ ыытылларын сураста. Онуоха бу тирээн турар кыһалҕаны быһаарыыга үлэ былааннанан ыытыллыахтааҕын, билигин интэринээт-оскуола томторугар сотору кэминэн улахан суолталаах спортивнай эбийиэктэр тутуллалларынан, онно сүрүн болҕомто туһаайылларын туһунан Степан Анатольевич быһааран хоруйдаата. Итини тэҥэ “Хатан” тэрилтэ көрөр-истэр уопсай дьиэлэрин уунан хааччыллыытын боппуруоһа биир эмиэ долгутар ыйытыгынан турда. Онуоха улуус баһылыга ханнык төрүөтүнэн маннык кыһалҕа үөскээбитин сиһилии быһааран туран, бу боппуруоска үлэлэһэ сылдьалларын, Бырабыыталыстыба мунньаҕар нэһилиэк баһылыга Владимир Сивцев туһааннаах боппуруоһун туруорсубутун эттэ. Итини тэҥэ С.А. Новгородов аатынан Чурапчы орто оскуолатыгар эбии салҕааһын тутуу хаһан былааннанарын туһунан ыйытык үгүс дьону долгутар. Онуоха үбүлээһинин боппуруоһа быһаарылыннаҕына биирдэ үлэ саҕаланыахтааҕын, быйыл бу оскуолаҕа хапытаалынай өрөмүөн үлэтэ ыытыллара былааннанарын эттилэр.
Ыйытыылар үксүн суругунан киирэн эппиэттэннилэр. Онуоха бэйдиэ сылдьар ыттары бэрээдэктээһин, сыбаалка сирин-уотун ыраастааһын, гаас ситимигэр холбоммут ыалларга сыл аайы техоборудованиены көрүү-истии өҥөтүгэр быһыллар төлөбүр, элбэх оҕолоох ыалларга уһаайба сирин уочаратын, производственнай тэрилтэ үлэһиттэригэр көрүллэр чэпчэтиилэр көрүҥнэрин, демография, уһуйаан саҥа дьиэлэрин тутуу, кэтэх хаһаайыстыбаны сайыннарыыга көрүллэр көмө, граннарга үлэлэһии, ДЭС оройуонугар гаас ситимэ хаһан тардылларын туһунан о.д.а. ыйытыктар киирэн хоруйданнылар. Итини тэҥэ Мурунтан, Интэринээт-оскуолаттан нэһилиэк киининээҕи оскуолаҕа элбэх оҕо үөрэнэринэн, нэһилиэк автобуһун маршрутун туруорустулар. Этиилэргэ нэһилиэк олохтооҕо Иван Пономарев нэһилиэктэртэн улуус киинигэр уонна куоракка көһөн киирии элбээбитин, үгүс нэһилиэккэ дьон ахсаана аҕыйаан иһэрин этэн туран, мониторинг оҥорорго, итинтэн сылтаан тыа хаһаайыстыбатын сайдыыта эмиэ мөлтөөн иһэрин, онон дьону-сэргэни нэһилиэктэргэ олохсутууга хайысхалаах үлэни тэрийэн үлэлэһэргэ, ону тэҥэ сүөһүнү-сылгыны уостаан тэрийиигэ этиилэрин киллэрдэ.
Түмүккэ улуус баһылыга Степан Саргыдаев отчуокка киирбит сүрүн ыйытыылар, туруорсуулар, этиилэр түмүллэн, улууска ыытыллыахтаах үлэни-хамнаһы былааннааһыҥҥа, соруктары туруорууга көрүллүөхтэрэ диэн этэн туран, улууспут сайдарын туһугар бары бииргэ түмсэн салгыы таһаарыылаахтык үлэлииргэ-хамсыырга ыҥырда.
Нэһилиэк олохтоохторо ааспыт сылга ыытыллыбыт улуус дьаһалтатын үлэтин-хамнаһын үчүгэйинэн сыаналаатылар.
Анна Захарова. Семен Жендринскэй хаартыскаҕа түһэриитэ.