Аан дойдутааҕы доруобуйа күнүн чэрчитинэн уонна Чурапчы нэһилиэгэр Чөл олох сылынан улуустааҕы киин бибилэтиэкэҕэ «Тымныынан эмтэнии—тыыны кэҥэтии» диэн Чэбдик» кулууп чилиэннэрин кытта истиҥ көрсүһүү тэрилиннэ. Бу түмсүү 29 сыллааҕыта Афанасий Дорофеев —Чурапчы Моржата диэн ытыктаан ааттыыр биир дойдулаахпыт көҕүлээһининэн тэриллибитэ. Ол кэмтэн кини чөл олоҕу тарҕатыыга, эти-хааны тымныынан чэбдигирдиигэ анаабыт кэскиллээх үлэтин-хамнаһын уһуйуллааччылара салгыыллар. Бу тэрээһиҥҥэ түмсүү салайааччыта Николай Дьячковскай уонна Мэхэтээн Мындыр Куйаар Таппааһай Уола, Николай Новгородов «Уу, тымныы эккэ-сииҥҥэ туһата», «Массаас, сөпкө аһааһын», «Сөпкө аһааһын эти-сиини ыраастыыр ньымата» диэн тиэмэлэргэ туһаныы ньыматын, тус уопуттарын тула санааларын үллэһиннилэр. Көрсүһүүнү улуустааҕы киин бибилэтиэкэ үлэһитэ Вероника Маркова салайан ыытта. Кини бэйэтэ эмиэ бу кулуупка киирэн тымныынан дьарыктаммыта иккис сыла. «Билиҥҥи тэтимнээх олоххо эдэрдэртэн саҕалаан бары күүрэн, ыгыллан сылдьабыт. Онуоха доруобуйаҕын маннык ньыманан чэбдигирдии олус наада», — диэн санаатын үллэстэр.
«Чэбдик» кулууп салайааччыта Николай Дьячковскай сылы эргиччи сөтүөлүүрүн таһынан, Геннадий Малахов суруйбут кинигэтин туһанан, аччыктааһын көмөтүнэн доруобуйатын туругун тупсарар эбит. Ол туһунан кэпсээнин дьон сэргии иһиттэ, элбэх ыйытыктары биэрдилэр. Николай Новгородов сөптөөхтүк аһааһын доруобуйаҕа дьайыытын, массаас ньымаларынан доруобуйаны тупсарыы, эти-хааны чэбдигирдии, уһун үйэлэнии кистэлэҥнэриттэн үллэһиннэ. Мындыр Куйаар тымныы уунан үс куту бөҕөргөтүү, дьайы ыраастааһын, 7 ойбоҥҥун чөл туруктааһын, биополе, аура туһунан үгүһү кэпсээтэ.
Бу кулуупка 10- ча сыллааҕыта кэлбит Светлана Старостина, Христина Павлуцкая доруобуйаларын туруга тупсубутун, тымныы уу уйулҕаны да сааһылыырын, бөҕөргөтөрүн, олоххо дьулуһуу күүһүрэрин бэлиэтээтилэр. Уопсайынан, көрсүһүүгэ кыттыбыт хас биирдии киһи маннык дьарык ис дьоҕургун арыйыыга, майгыҥ-сигилиҥ үтүө өрүккэ уларыйарыгар, олоххо тардыһыыҥ күүһүрэригэр, кутуҥ-сүрүҥ сааһыланарыгар, бөҕөргүүрүгэр олус көмөлөһөр диэн эттилэр.
Бу тэрээһиҥҥэ улуустааҕы спорт управлениетын начаалынньыга Дьулустан Егоров Саха өрөспүүбүлүкэтигэр физкултуурунай хамсааһын 100 сылыгар анаммыт бэлиэни Николай Дьячковскайга уонна Мындыр Куйаарга туттарда.
Бэлиэтээн эттэххэ «чэбдиктэр» ойбоҥҥо сөтүөлүүр ньымаларын билсэ, бу сыллар устата Дойду араас муннуктарыттан чинчийээччилэр, сэҥээрээччилэр кэлэн билсэн, кэпсэтэн, видеоҕа устан барбыттара. Быйыл бу кулууп уопсастыбаннай түмсүү статуһун ылан, Ил Дархан граныгар кытта сылдьар. Онон кинилэр бырайыактара ситиһиилэнэригэр баҕарабыт.
Анна Захарова.