СӨ ускуустубатын үтүөлээх диэйэтэлэ, Былатыан Ойуунускай аатынан Сударыыстыбаннай бириэмийэ лауреата, РФ худуоһунньуктарын Сойууһун чилиэнэ, Сунтаар улууһун Бочуоттаах олохтооҕо Андрей Васильевич Чикачев норуокка биллэр улахан үлэлэрин анал быыстапката бүгүн оройуоннааҕы “Айылгы” НАДь-гэр Афанасий Мунхалов аатынан арт-галереяҕа арылынна.
Аныгы кэм биллэр худуоһунньуга Андрей Васильевич, анаабыт курдук Мунхаловтаах, Романовтаах, Собакиннаах Чурапчы улууһугар хайаан даҕаны хаһан эрэ, ханан эмэ кэлэн таарыйан ааһыахтаах этэ. Мустубут дьон бука бары эппиккэ диэри “Чикачеву таҥаһыттан-сабыттан тутан туран эрэ” хас биирдии хамнаныытын, үлэлэрин ырытан, анааран кэпсиирин батыһа сылдьаннар көрдүлэр-иһиттилэр.
Быыстапка үөрүүлээх арыллыытыгар “Чурапчы улууһа” МО баһылыга Степан Саргыдаев, улуус култуураҕа управлениетын начаалынньыга Петр Гуляев кэлбит улахан ыалдьыты эҕэрдэлээн туран махтал суругу, сэмэй бэлэхтэри туттардылар. “Бүгүн элбэх дьон муһунна – бу буолар норуот дьиҥ чахчы билиниитэ. Кэлбит кырачаан оҕолортон хайаан даҕаны, биир бэйэм олох 100 бырыһыан эрэнэбин, хайаан даҕаны улахан худуоһунньук үүнэн-сайдан тахсыаҕа”, — диэн Степан Анатольевич эттэ.
Улахан худуоһунньук айар үлэтигэр сүгүрүйээччи үгүс. Андрей Гоголев аатынан оҕо муусукалынай оскуолатын 5-с художественнай оскуолатын үөрэнээччитэ Сайаана Софронова, Андрей Васильевич биир биллэр үлэтин уруһуйдаабытын ааптарга бэлэх уунна.
“Бастатан туран Чурапчы улууһун дьонугар-сэргэтигэр, “Мунхалов куйаара” хартыына галереятын тутаах үлэһиттэригэр улахан махталбын биллэрэбин. Айар үлэм туһунан кылгастык сырдатар эбит буоллахха, кыра сылдьан Сунтаарга түөрт кылаастаах художественнай оскуоланы бүтэрбитим онтон 8-с кылаас кэнниттэн Дьокуускай куоракка художественнай училищены түмүктээбитим. Ол кэнниттэн Владивосток куоракка ускуустуба үнүстүүгэр үөрэммитим. Инньэ гынан үөрэммитим элбэх, 1984 сылтан худуоһунньуктар Сойуустарыгар баарбын. Бэйэм айар-тутар мастарскыайдаахпын ол онно олорон үлэлиибин. Дьиэ кэргэммитигэр бэһис игирэ оҕолорунан күн сирин көрбүппүт. Ийэлээх аҕам учуутал этилэрэ. Аҕам завуч этэ, хомойуох иһин эрдэ олохтон туораабыта. Кини уруһуйдуурун наһаа сөбүлүүрэ, олоҕун устатын тухары “худуоһунньук буолбатым” диэн наһаа кэмсинэрэ. Оскуолаҕа изостудия диэни тэрийэн оҕолору үөрэтэрэ, бэйэтин билиитин үгүстүк хаҥатынара. Ол да иһин буолуо, кыра сааспыттан “аҕаҥ худуоһунньук буолбатаҕыттан” худуоһунньук эрэ буолаҕын диэн кэбиспиттэрэ. Оонньуурум даҕаны оччотооҕуга пластилин уонна харандаас эрэ буолара”, — диэн Андрей Васильевич кылгастык кэпсээтэ.
Биллэр худуоһунньук үлэлэрэ нэдиэлэ устата “Мунхалов куйаара” арт-галереяҕа туруохтара, манна даҕатан эттэххэ хартыыналар аҥардара оригинал буолаллар, мусуой дьиэлэриттэн, биирдиилээн дьонтон, доҕотторуттан уларсан аҕалан көрдөрүккэ турдулар.
Итини сэргэ бу күн, жикле технологиятынан биллэр хартыыналарын копияларын аҕалан удамыр сыанаҕа атыылаата. Дьон-сэргэ астына-дуоһуйа иккилии-үстүү үлэни атыылаһан, үөрэн-көтөн тарҕастылар.
Сэмэн ЖЕНДРИНСКЭЙ. Ааптар хаартыскаҕа түһэриитэ
Наталья Сибирякова видеота