Билигин олох хаамыыта тэтимирэр, сыана күннэтэ үрдүү турар кэмигэр хас биирдии киһи эбии дохуот оҥостор суолу-ииһи тобуларга дьулуһар. Ким эрэ бэйэ дьыалатын саҕалыыр, ким эрэ маҕаһыын арыйар, ким эрэ сөбүлүүр дьарыгын сайыннаран дохуот киллэринэр ньыманы булунар.
Оннук курдук эдэр ийэ, кондитер, Чурапчытааҕы аграрнай-техническэй колледж исписэлииһэ Туйаара Портнягина эмиэ аҕыйах сылтан бэттэх биир сөбүлүүр хоббитынан үлүһүйэн туран дьарыктанан киэҥ эйгэҕэ таһааран эрэр. Кини имбирнэй бирээнньиктэри оҥорон, кириэминэн киэргэтэн дьоҥҥо-сэргэҕэ атыылыыр. Билэр дьон сыл аайы Билии күнүгэр, оҕолорун төрөөбүт күннэригэр, саҥа дьыл бырааһынньыгар киниэхэ тупсаҕай көстүүлээх бирээнньиктэн букет, торду киэргэтэр декор сакаастыыллар. «Мин аан бастаан пандемия бүтэрин саҕана, 2021-22 сыллаахха, имбирнэй бирээнньик оҥорууга, киэргэтиигэ онлайн куурус ыламмын көрбүтүм уонна аан маҥнай боруобалаан оҥорбутум. Бэйэм бурдук аһы, минньигэһи, ас астыырбын сөбүлүүр буоламмын хара ааныттан чэпчэкитик табыллыбыта. Бастакы холонуум табыллыбытыттан мин олус диэн үөрбүтүм, кынаттаммытым диэххэ сөп. Онтон ыла кыралаан иллэҥ кэммэр дьарыктанар буолан барбытым. Эбии үөрэнэн, элбэх ньыманы баһылаан, кыралаан сакаас ылан саҕалаабытым. Былырыын социальнай хантараакка бизнес-план оҥорон кыттыбытым, ол үбүнэн аска туттуллар анал принтер, духовка оһох уо.д.а. туһааннаах мал-сал, бородуукта ыламмын өссө үгүһү оҥорорго, сайдарга кыах үөскээбитэ, онон мин маннык өйөбүл баарыгар өрөспүүбүлүкэбит, улууспут салалтатыгар, улуустааҕы социальнай харалта управлениетын үлэһиттэригэр улахан махталбын тиэрдэбин»,-диэн билиһиннэрэр Туйаара.
Кини биһиэхэ, «Саҥа олох» эрэдээксийэтин дьиэтигэр бэйэтэ оҥорбут бирээнньиктэрин, кириэмин бэлэмнээн илдьэ кэлэн киэргэтиигэ маастар кылаас ыытта. Ахсынньы ый сүпсүлгэниттэн тэйэн, кыра оҕолуу үөрэн, бэйэбит айан-тутан, хаары, харыйаны, Тымныы оҕонньору кырааскалаан эмискэ алыптаах эйгэҕэ баар буола түспүт саҕа сананныбыт. «Сымыыт үрүҥүттэн оҥоһуллар кириэминэн киэргэтиллэр, онон киэҥ эйгэҕэ таһаарарга, дьоҥҥо атыылыырга сэрэхтээх буолан бэлэм булкаас ылабын, оннук быдан табыгастаах. Саҥа дьылы көрсө оҕолору кытары маннык бирээнньиктэри астаан бэйэ баҕатынан киэргэтэр олус үчүгэй, дьиэ кэргэн биитэр ийэ кыыһынаан үлүһүйэн туран биир дьарыкка бииргэ түмсэрэ, оҥоһуллубут үлэ түмүгүттэн дуоһуйара, бу түгэннэри хаартыскаҕа түһэрэн, видеоҕа устан өйдөбүнньүк гынара туохха да тэҥнэммэт күндү буоллаҕа»,-диэн Туйаара Семеновна санаатын үллэстэр.
Кырдьыга даҕаны, оннук буоллаҕа. Биһиги күдү сурутааччыларбыт, эһиги эмиэ Туйаара Портнягина төлөпүөнүгэр эрийэҥҥит, суруйаҥҥыт маастар кылаас да буоллун, кырасыабай бэчиэнньэлэри да буоллун эбэтэр бэйэҕит киэргэтэргитигэр аналлаах бэлэм набордары сакаастыаххытын сөп (Туйаара нүөмэрэ: +79247628664 ). Саҥа дьылы көрсө үөрэ-көтө маастар кылааска сылдьан сүргэҕитин көтөҕүҥ, ураты минньигэс бэлэҕи бэйэҕитигэр оҥостуҥ!
Наталья Сибирякова, ааптар видеоҕа устуута
&
;