Ахсынньы 1 күнүгэр, доруобуйаларынан хааччахтаах дьон дэкээдэлэрэ саҕаламмытынан, оҕо чинчийэр үлэҕэ интэриэһин тардар, кэпсиир дьоҕурун сайыннарар, туһалаах информацияны туһана үөрэнэригэр сыаллаах-соруктаах “Тэбэнэт саас ааҕыылара” диэн научнай-практическай кэмпириэнсийэ улуустааҕы Оҕо бибилэтиэкэтигэр бэрт тэрээһиннээхтик буолан ааста.
Кэмпириэнсийэ 11-16 саастаах доруобуйаларынан хааччахтаах оҕолор ортолоругар анаан V-с төгүлүн ыытылынна. Оҕолор бэйэлэрин интэриэстэринэн, дьоҕурдарынан дакылааттары аахтылар, боппуруостарга эппиэттээтилэр. Дьүүллүүр сүбэ хамыыһыйатыгар нэһилиэк дьаһалтатын исписэлииһэ Мария Матвеева, улууска өр сылларга доруобуйаларынан хааччахтаах дьон уопсастыбаннай түмсүүлэрин салайааччытынан үлэлээбит Римма Дьячковская анаан-минээн үлэлээтилэр.
“Бу күн оҕолор урукку сылларга суруйбут үлэлэрин быыстапкаҕа туруордубут, тохтобул кэмигэр көмпүүтэри туһанан таабырын таайтардыбыт. Тэрээһин сүрүн успуонсардарынан “Ситим” атыы-эргиэн киинэ — салайааччы Зоя Николаевна Сивцева, “Книжный мир” — салайааччы Татьяна Егоровна Попова, “Айар” национальнай кинигэ кыһата — дириэктэр Август Васильевич Егоров, Чурапчы улууһун дьахталларын Сэбиэтэ – салайааччы Анастасия Ивановна Афанасьева уонна Чурапчы нэһилиэгин баһылыга Владимир Дмитрьевич Сивцев буоллулар. Кинилэргэ дириҥ махталбытын тиэрдэбит”, — диэтэ бибилэтиэ үлэһитэ Елена Дьячковская.
Ааҕыы түмүгүнэн, бастакы миэстэ — 5 кылаас үөрэнээчитэ Данил Ильинов, иккис миэстэ — 9 кылаас үөрэнээччитэ Карина Афанасьева, үһүс миэстэ — 9 кылаас үөрэнээччитэ Күннэй Кычкина буоллулар. Ону таһынан Стас Оконешников, Нарыйаана Никитина биһирэб бирииһинэн бэлиэтэннилэр. Биэс сыл устата ситимнээхтик кыттыбыт оҕолор ааҕыылара тупсубутун, боппуруоска иҥнибэккэ эппиэттииллэрин, истибит дакылааттарыгар оруннаах ыйытыктары биэрэ үөрэммиттэрин экспертэр, учууталлар тоһоҕолоон бэлиэтээтилэр.
Улуустааҕы Оҕо бибилэтиэкэтин пресс-киинэ