Үгэс курдук сыл аайы ыытыллар култуура үлэһиттэрин сүбэ мунньаҕа Чурапчы нэһилиэгин “Айылгы” НАДь-гэр сонун хайысхалаах саҕаланна. Улууспут 17 нэһилиэгиттэн барыта 200-тэн тахса култуура дьиэлэрин, муусука уонна ускуустуба оскуолаларын дириэктэрдэрэ, уус-уран салайааччылара, мусуой, бибилэтиэкэ үлэһиттэрэ, норуодунай кэлэктииптэр кыттыыны ыла кэллилэр.
Мунньахха СӨ култуура уонна духуобунас сайдыытын миниистирэ Афанасий Ноев быһа сибээскэ тахсан кыттыыны ылбыта мунньах таһымын үрдэттэ. Афанасий Иванович бэйэтин этиитигэр Чурапчы улууһун култуураҕа салаатын үлэһиттэрэ мэлдьи инники күөҥҥэ сылдьалларын итиэннэ быйылгыттан атын эрэгийиэннэр баай уопуттарын кытары атастаһан саҥалыы сайдыы суолугар үктэммиттэрин биһириирин эттэ, бука барыларын кыстыкка үктэммиттэринэн, кытаанах доруобуйаны баҕаран туран эҕэрдэлээтэ.
- Бүгүҥҥү күҥҥэ үлэбит сүрүн соруктарын ылыныахтаахпыт, дьоммут санааларын истиэхпит. Быйылгы дьылга уратыбыт диэн биһиэхэ быһа биэриинэн Бурятияттан кэллиэгэлэрбит бэйэлэрин бырайыактыыр үлэлэрин үс сүрүн хайысхатын кэпсиэхтэр, кинилэри кытары Забайкальскай кыраай Чита куоратыттан кэллиэгэлэрбит эмиэ тахсаннар үлэлэрин-хамнастарын билиһиннэриэхтээхтэр. Итиннэ хайдах табылларынан хардарыта боппуруостары биэрсэн хоруйдары истиэхпит. Онтон күн иккис аҥарыгар былаһааккаларынан тарҕаһаммыт үлэлиэхпит. Маннык саҕалааһын бэйэбит хайысхабытыгар аан бастакытын ыытыллар, — диэн Чурапчы улууһун култуураҕа управлениетын начаалынньыга Петр Гуляев кэпсээтэ.
Тэрээһин үөрүүлээх чааһыгар улуус дьаһалтатын исписэлииһэ Алена Пермякова кыттыыны ылла, кини манна 2024 сылга үлэҕэ киириэхтээх Бахсытааҕы НАДь-тин, СӨ бастакы Ил Дархана Егор Борисов архыып-бибилэтиэкэтин дьиэтэ түмүктэнэн үлэҕэ киирилэрин уонна Хатылытааҕы көһөрүү мусуойа тутулларын туһунан үөрүүлээх сонуннары иһитиннэрдэ.
Култуура начаалынньыга Петр Егорович үчүгэй көрдөрүүлээх үлэһиттэригэр эҕэрдэ сурутары уонна Алаҕар нэһилиэгин эр дьонун ансаамбыла, Мугудайдааҕы “Көлүкэчээн” оҕо үҥкүүлүүр ансаамбыла, Петр Решетников аатынан норуот тыйаатыра норуодунай ааттарын бигэргэппиттэрин туоһулуур сэртэпикээттэрин туттарда. Быйылгы сыллаахха саҥардыы үлэҕэ ананан кэлбит эдэр исписэлиистэри эҕэрдэлээн чиэстээтилэр.
Сэмэн Жендринскэй. Ааптар хаартыскаҕа түһэриитэ