Чурапчы нэһилиэгин Мурун Тыымпыйа түөлбэ олохтоохторо, аҕас-балыс Татьяна уонна Надежда Захаровалар тиэргэннэрин иһигэр сайын ахсын араас сиэдэрэй сибэкки сириэдийэр, оҕуруот аһын арааһа өлгөмнүк үүнэр, эҥин бэйэлээх ураты декоративнай мастар көрбүт эрэ киһи хараҕын манньыталлар.
Быйыл Татьяналаах Надежда арбузтара, тыквалара өлгөмнүк үүммүт. Икки эрэ уктан 10-ча тыкваны, 12 уктан 20-чэ арбуһу ылбыттар. Аны яблоня маһы боруобалаан үүннэрэн дьаабылыка амсайбыттар. Кукуруза үүннэрэн боруобалаабыттара силигилии сиппит. Виноградтарын угун быйыл саҥардыбыттар.
Надежда Николаевна билиһиннэрбитинэн, урут төрөппүттэрэ баар эрдэҕиттэн, оскуолаҕа үөрэнэр кэмнэриттэн оҕуруот аһын үүннэриинэн сөбүлээн дьарыктаналлар эбит. Аҕалара олорпут мастара билигин силигилээн турарын көрөн, оччотооҕу оҕо саастарыгар эргиллэллэр. Кэлин «Чурапчы» сопхуоска Ньидьилигэ балтынаан Татьяна Николаевналыын оҕуруокка үлэлии сылдьыбыттар.
Кэлин аҕас-балыс сөбүлүүр дьарыктарын умнууга хаалларбакка, сэдэх көрүҥ оҕуруот аһын, талахтары үүннэрэн, сылтан сыл элбэтэн, дьоннорун-сэргэлэрин үөрдэллэр, көрбүтү эрэ сөхтөрөллөр. Манна сыһыаран эттэххэ, 2010 сыллаахха ыытыллыбыт «Тиэргэн» улуустааҕы куонкуруска үһүс миэстэни ылбыттара.
Анна Захарова