Бүгүн о.э. тохсунньу 14 күнүгэр, Чурапчы нэһилиэгэр олорор Дайаана уонна Вячеслав Спиридоновтар олохторун бииргэ холбуур баҕаларын сокуонунан бигэргэттилэр.
Ньурбаттаан төрүттээх, чааһынай дьыаланан дьарыктаах Вячеслав, ыал буоларга Дайаана сөбүлэҥин өссө ааспыт сыл ахсынньы 7 күнүгэр ылбыт эбит. Ол иннинэ эдэрдэр 2022 сыл күһүнүгэр, дьоллоох Дьокуускай куоракка доҕотторун урууларыгар ыалдьыттыы сылдьаннар билсибиттэр.
“Ыал буолар чыыһылабытын эрдэттэн анаан-минээн талбатахпыт, онтубут баара бүгүҥҥү Эргэ Саҥа дьылга түбэстэ. Бүгүн сокуонунан бэлиэтэннибит онтон сыбаайбабытын аны сайын эҥин бэлиэтиир былааннаахпыт. Чурапчы улууһугар быйылгы дьылга бастакынан саҥа ыал буолбуппутунан наһаа үөрдүбүт. Эдэр ыаллар өссө даҕаны үксүү турдуннар”, — диэн Чурапчы улууһун Арыылаах нэһилиэгиттэн төрүттээх, билигин Степан Макаров аатынан Чурапчы гимназиятыгар педагог-организаторынан уонна фольклор салаатыгар уһуйар Дайаана (Попова) Спиридонова үөрүүтүн үллэһиннэ.
Саҥа тэриллибит дьиэ кэргэни олохторугар улахан суолталаах түгэнинэн эҕэрдэлиэҕиҥ! Эдэрдэргэ дьолу, өйдөһүүнү, этэҥҥэ буолууну баҕарыаҕыҥ!
Сэмэн ЖЕНДРИНСКЭЙ