Бүгүн, Чурапчы нэһилиэгин Александр Федотов аатынан успуорт уораҕайыгар элбэх киһи тоҕуоруһа муһунна. Ол курдук, сахалар төрүт көрүҥнэрбитигэр өрөспүүбүлүкэҕэ биирдиилээн итиэннэ хамаанданан бастыыр иһин чөмпүйэнээт аан бастакытын ыытыллар.
Успуорт улахан бырааһынньыгар Амма, Анаабыр, Бүлүү, Үөһээ Бүлүү, Үөһээ Дьааҥы, Горнай, Дьокуускай куораттан, Кэбээйи, Мэҥэ Хаҥалас, Мииринэй куораттан, Муома, Нам, Ньурба, Орто Халыма, Өймөкөөн, Сунтаар, Таатта, Уус Алдан, Эбээн Бытантай, Чурапчы улуустарыттан барыта холбоон 46 ыспарсымыан кыттыыны ыла кэллэ. Күрэхтэһии кылаабынай судьуйатынан улууспутугар успуор улахан салайааччыта, Алаҕар нэһилиэгин баһылыга Иван Оконешников үлэлиир. Итини таһынан өрөспүүбүлүкэҕэ улахан ыспартыыбынай суруналыыстара Александр, Василий Посельскайдар сүүрэ-көтө, бу икки күннээх күрэхтэһиини сырдатыахтара.
Чөмпүйэнээт үөрүүлээх арыллыытыгар Чурапчы улууһун Аҕа баһылыга Степан Саргыдаев, Чурапчы улууһун дьокутааттарын Сэбиэтин итиэннэ оройуоҥҥа төрүт оонньуулар бэдэрээссийэлэрин бэрэссэдээтэлэ, Дыгын оонньууларын призера, ыараханы көтөҕүүгэ өрөспүүбүлүкэ рекордсмена Яков Оконешников, “Прогресс” ХЭТ генеральнай дириэктэрэ, биир дойдулаахпыт, Дыгын оонньууларын сүрүн успуонсара, меценат Алексей Пинигин, СӨ Ил Түмэн дьокутаата, Баһылай Манчаары аатынан төрүт успуорт киинин дириэктэрэ Геннадий Васильев, Дыгын оонньууларын үс төгүллээх чөмпүйүөнэ, биир дойдулаахпыт, күрэхтэһии кылаабынай судьуйата Иннокентий Макаров, Арассыыйаҕа мас тардыһыытын бэдэрээссийэтин президенэ Михаил Гуляев эҕэрдэ тылы эттилэр.
“Саха төрүт оонньуута баарын тухары биһиги норуоппут омук быһыытынан симэлийиэ суоҕа. Ханнык баҕарар успуорт олус туһалаах, ыччаттарбыт хайаан даҕаны успуордунан дьарыктаныахтаахтар”, — диэн Алексей Семенович эттэ.
Күрэхтэһээччилэри Сахабыт эстрадатын маанылаах куоластара Сахая уонна Кирилл Матвеев ылбаҕай ырыаларынан эҕэрдэлээтилэр.
Эрдэ этиллибитин курдук күрэхтэһии икки сиринэн ыытылла турар, күн бастакы аҥарыгар ыспарсымыаннар “Үс төгүл үс” сахалыы ыстаҥаҕа физкултуурунай үнүстүүт баазатыгар илин-кэлин түһүспүттэрэ оттон “Тутум эргиирин” Александр Федотов аатынан успуорт уораҕайыгар кэлэннэр сымсаны быһаарыстылар.
Үс төгүл үс
Дьахталларга
1 миэстэ – Евгения Адамова (Уус Алдан);
2 миэстэ – Варвара Саввинова (Мииринэй);
3 миэстэ – Таинна Спиридонова (Анаабыр).
Үс төгүл үс
70 киилэҕэ диэри ыйааһыннаах эр дьоҥҥо
1 миэстэ – Валентин Афанасьев (Ньурба);
2 миэстэ – Артем Дьяконов (Кэбээйи);
3 миэстэ – Всеволод Тарасов (Орто Халыма).
70 киилэттэн үөһэ ыйааннаах эр дьоҥҥо
1 миэстэ – Владислав Попов (Нам);
2 миэстэ – Николай Обоев (Ньурба);
3 миэстэ – Борис Сдвижков (Амма).
Тутум эргиир
Дьахталларга
1 миэстэ – Кэрэчээнэ Кириллина (Орто Халыма);
2 миэстэ – Евгения Адамова (Уус Алдан);
3 миэстэ – Таинна Спиридонова (Анаабыр).
Тутум эргиир
70 киилэҕэ диэри ыйааһыннаах эр дьоҥҥо
1 миэстэ – Артем Дьяконов (Кэбээйи);
2 миэстэ – Арсен Федоров (Мэҥэ Хаҥалас);
3 миэстэ – Айастаан Колесов (Эбээн Бытантай).
70 киилэттэн үөһэ ыйааннаах эр дьоҥҥо
1 миэстэ – Борис Сдвижков (Амма);
2 миэстэ – Алексей Соколов (Сунтаар);
3 миэстэ – Павел Друзьянов (Чурапчы).
Мантан киэһэ ыспарсымыаннар мас тардыһыытын күрэҕэр ким күүстээҕин быһаарсыахтара. Сарсын сарсыардаттан үнүстүүт манеһыгар 400 миэтэрэҕэ сүүрүү ол кэнниттэн Александр Федотов аатынан успуорт саалатыгар хапсаҕай, оҕунан ытыы, ыараханы көтөҕүү курдук көрүҥнэргэ интэриэһинэй күрэхтэһиини көрүөхпүт. Кыайыылаахтары наҕараадалааһын сиэрэ-туома ыытыллыаҕа.
Сэмэн Жендринскэй. Ааптар хаартыскаҕа түһэриитэ