Бэҕэһээ А. К. Софронов аатынан спорт саалатыгар доруобуйаларынан хааччахтаах дьоҥҥо анаан, улууска бастакытын
сахалыы остуол оонньууларыгар— хабылыкка, хаамыскаҕа күрэхтэһии буолан ааста.
Уопсайа 7 нэһилиэктэн — Чурапчыттан, Хоптоҕоттон, Одьулуунтан, Сылаҥтан, Төлөйтөн, Хатылыттан, Болтоҥоттон, Болугуртан, Алаҕартан 23 спортсмен көхтөөх оонньууну көрдөрдүлэр. 
Төлөйтөн сылдьар Мария Капрынова сахалыы остуол оонньуутугар маастар — кылаас ыытта. Күрэххэ кылаабынай судьуйанан Марфа Дьячковская, сэкирэтээринэн Мария Капрынова, судьуйа көмөлөһөөччүлэринэн Елизавета Винокурова, Дмитрий Сорокоумов үлэлээтилэр. Кинилэр бары — республика чемпионнара,призердара буолаллар.
Түмүккэ дьахталларга 1 миэстэни Розалия Данилова (Хатылы), 2 миэстэни Анна Сергеева (Чурапчы), 3 миэстэни Евдокия Протодьяконова (Сылаҥ) ыллылар. Эр дьоҥҥо түмүк маннык буолла: 1 миэстэ — Абрам Гермогенов (Болугур), 2 миэстэ — Прокопий Наумов(Хоптоҕо), 3 миэстэ —Георгий Захаров (Чурапчы). Ону таһынан икки анал аат туттарылынна. «Бастыҥ оонньооччу» аатын Хатылыттан Евдокия Кычкина, «Кэскиллээх оонньооччу» аатын Дириҥтэн Прокопий Наумов ыллылар.
Өйү-санааны сайыннарар, сымса туттууну эрэйэр, көҕү, көрү-нары көҕүлүттэн туттарар сахалыы төрүт остуол оонньуулара көдьүүһэ улахан. оруолу ылар. Доруобуйаларынан хааччахтаах спортсмен дьоммут ортотугар киэҥ сэҥээриини ылбыта балай да ыраатта. Ол түмүгэр республика таһымнаах күрэхтэргэ куруутун ситиһиилээхтик кыттан миэстэлэһэллэр, бастыҥнар кэккэлэригэр сылдьаллар.
Бүгүҥҥү күрэхтэһии олунньуга буолуохтаах республикатааҕы чемпионат сүүмэрдээһинин быһыытынан буолла. Хамаанданы тэрийиигэ салгыы үлэ ыытыллар. Иннокентий Матвеев.