Бүгүн, Чурапчы нэһилиэгэр, Александр Федотов аатынан успуорт уораҕайыгар барыта холбоон аҕыс улуустан, ааттаах-суоллаах ыспарсымыаннар сахалыы остуол оонньууларыгар быйылгы сылы түмүктүүр, Бэдэрээссийэ Кубогын иһин бастыҥнары быһаарар улахан түһүлгэҕэ муһуннулар.
Ыспарсымыаннар барааттарыттан Чурапчы улууһуттан, сахалыы успуорт оонньуларыгар СӨ успуордун маастара Дархан Степанов салайан киирдэ. Күрэхтэһии сиэр быһыытынан өрөгөй ырыатынан саҕаланна.
Үөрүүлээх чааска Чурапчы улууһун баһылыгын социальнай боппуруостарга солбуйааччы Мария Кронникова, “Көмүлүөк” эргинэр-бырамыысаланнай фирманы төрүттээччи уонна генеральнай дириэктэр, СӨ остуол оонньууларын бэдэрээссийэтин бэрэссэдээтэлэ Ольга Григорьева, Чурапчы улууһун остуол оонньууларыгар бэдэрээссийэтин бэрэссэдээтэлэ Анатолий Александров, Төлөй нэһилиэгин баһылыга Игорь Николаев о.д.а. кыттыыны ыллылар.
Устуоруйа быыһын сэгэтэн көрдөххө, хабылык уонна хаамыска остуол оонньууларын бастакы улахан күрэхтэһиитэ 2016 сыллаахха Чурапчы улууһугар ыытыллыбыта. Ити кэмтэн ыла лоп курдук 8 сыл ааһа оҕуста, кылгас бириэмэ иһигэр биһиги оройуоммутуттан сахалыы остуол оонньууларыгар 4 успуорт маастара иитиллэн таҕыста, бу олус үчүгэй көрдөрүү. Инньэ гынан быйылгы Кубок иһин күөн көрсүһүү Чурапчы улууһугар иккис төгүлүн ыытыллар. Ханнык баҕарар дойдуга успуорка, үлэ-хамнаска энтузиаст дьонноох буолар, кинилэр истэригэр бүгүн биһиги, сахалыы остуол оонньууларыгар биир бастакынан успуорт маастарын ноурматын толорбут, билигин Төлөй нэһилиэгин орто оскуолатын дириэктэринэн бэрт таһаарыылаахтык үлэлии сылдьар Андрей Васильевич Деллоховы ааттыахпытын сөп.
Күрэхтэһии дьоро чааһыгар Ольга Григорьевна бэдэрээссийэ аатыттан өссө хас даҕаны ыспырсымыаҥҥа успуорт маастарын нуорматын толорбуттарын туоһулуур дастыбырыанньалары, махтал суруктары туттарда.
Успуорду сэҥээрээччилэр бүгүн успуорт уораҕайыгар кэлэҥҥит тыҥааһыннаах киирсиилэри көрүөххүтүн сөп итиэннэ “Көмүлүөк” фирма оҥоһуктарыттан олус туһалаах иһиттэри, симэхтэри атыылаһан барыаххытын сөп.
Сэмэн Жендринскэй. Ааптар хаартыскаҕа түһэриитэ