Бүгүн Е. А. Борисов аатынан архыып бибилэтиэкэҕэ бэлиэ дьоро күн буолан ааста. Ол курдук, Норуоттар икки ардыларынааҕы суруйааччылар сойуустарын түмсүүтүн, Саха Өрөспүүбүлүкэтин суруйааччыларын чилиэнэ, «Чурапчы» литературнай түмсүүтүн салайааччыта, Дьааҥытааҕы «Эчий» литературнай түмсүү чилиэнэ, Саха Өрөспүүбүлүкэтин култууратын туйгуна Римма Иннокентьевна Корякина —Хотууна 65 сааһынан үс саҥа кинигэтин биһирэмэ буолла.
Ааптар билиһиннэрбитинэн, Иван Мигалкин бэргэн этиилэригэр олоҕуран, оҕолорго анаан суруйбут «Минньигэс түүл остуоруйалара», улахан дьоҥҥо анаан «Үргүүк былыт быыһынан» диэн хоһооннорун хомуурунньуга уонна уһуйаан итиэннэ алын кылаас оҕолоругар кыыллары хоһуйар «Саҥа хаарга ким хаамта?» диэн хоһооннорун кинигэтэ «Айар» итиэннэ «Дани Алмас» кинигэ кыһаларыгар бэчээттэнэн таҕыста.
Бу дьоро күн улуус баһылыгын социальнай боппуруостарга солбуйааччы Мария Кронникова, «Айар» кинигэ кыһатын генеральнай дириэктэрэ Август Егоров, дириэктэри солбуйааччы Валерий Луковцев, Саха сирин суруйааччыларын сойууһун бэрэссэдээтэлин эбээһинэһин толорооччу Владимир Доллонов түмсүүтүн чилиэннэриниин, улуустааҕы култуура салаатын салайааччы Петр Гуляев, «Чурапчы» айар түмсүү чилиэннэрэ, Римма Иннокентьевна бииргэ үөрэммит, алтыспыт доҕотторо, чугас аймахтара, кэргэнэ Александр Егорович, оҕолоро кыттыыны ыллылар, эҕэрдэлэрин тиэртилэр, кини ураты суоллаах-иистээх суруйааччы, тапталлаах кэргэн уонна улахан дьиэ кэргэн күн күбэй ийэтэ буоларын иһирэх тылынан толору арыйдылар. Истиҥ тэрээһини бибилэтиэкэ сүрүн исписэлииһэ Вера Платонова сүрүннээтэ, ааптар айар үлэтин, олоҕун туһунан сиһилии сырдатта. Улуустааҕы култуура эйгэтин уолаттара, «Чурапчы» айар түмсүү чилиэннэрэ Хотууна хоһооннорунан литературнай композицияны туруордулар. Оттон С. А. Новгородов аатынан Чурапчы орто оскуолатын үөрэнээччилэрэ валяниенан оҥорбут куукулаларынан суруйааччы остуоруйатыттан көрдөрдүлэр. Бу тэрээһиҥҥэ ааптар «Уран тыл биһигэр бигэнэн» диэн кинигэтин быыстапката дьон болҕомтотун тарта. Римма Корякина-Хотууна айар кут умсулҕаныгар өссө оскуолаҕа үөрэнэр сылларыттан ылларбыт. Ол туһунан маннык сырдатта:»Омар Хаям рубаиларын биһирээн ааҕарым. Онтон да сиэттэрэн буолуо, бастакы хоһооннорбун нууччалыы тылынан суруйарым. Кэлин арыый сааһыран истэҕим аайы сахалыы айымньылары суруйар буоллум. Билигин 11 кинигэни таһаардым. 22 хоһоон хомуурунньугар хоһооннорум киирбиттэрэ, 18 хоһоон хомуурунньугун таһаарыыга үлэлээтим. Ону таһынан кэпсээннэри суруйабын, кэлин оҕолорго аналлаах остуоруйалары, хоһооннору суруйууга ылсан үлэлиибин», — диэн кылгастык айар үлэтин билиһиннэрдэ. Хотууна олох, дьылҕа, төрөөбүт дойду, айылҕа, дьиэ кэргэн, санаа ситимэ о.д.а. киэҥ тиэмэлэргэ суруйбут дириҥ өйдөбүллээх хомоҕой тыллаах хоһоонноро ааҕааччы улахан биһирэбилин ылаллар. Бу күн кини хоһоонноругар үгүс ырыа ылланна.
Түмүккэ Римма, Александр Корякиннар улахан дьиэ кэргэн 6 оҕолоро, кийииттэрэ, күтүөттэрэ тахсан, ийэлэрин эҕэрдэлээн, кини хоһоонноругар солбуйса сылдьан толорбут ырыалара хас биирдии киһи кутун тутта, дохсун ытыс тыаһа уҕараабата.
Анна Захарова.