Чурапчыга пионердар бааллар, тэрилтэ үлэлиир (Бүгүн Дойду үрдүнэн Пионерия күнэ)

Бүтүн Сойуустааҕы пионерскай хамсааһын тэриллибит күнүнэн 1922 сыл ыам ыйын 19 күнэ буолар. Бу күн Хомсомуол бүтүн Арассыыйатааҕы иккис кэмпириэнсийэтигэр дойду үрдүнэн пионердар этэрээттэрин тэрийэр туһунан быһаарыныы ылбыттар. 1924 сыл тохсунньу 21 күнүгэр пионерскай тэрилтэҕэ В.И.Ленин аата иҥэриллибит. Бу сыл сааһыгар “Пионерская правда” хаһыат бастакы нүөмэрэ тахсыбыт. Кыһыл хаалтыһы баана сылдьыбыт хас биирдии киһи — горн, барабаан ньиргиэрдээх пионерскай сбордары, кутаа тула түмсүүлэри күн бүгүнүгэр диэри умнубакка саныы, үтүө өйдөбүл гынан ахта сылдьара чахчы.

Күн бүгүн, Чурапчы улууһун Семен Флегонтов аатынан Хадаар орто оскуолатын Дьоруой пионер Сима Сергеев аатынан оҕо хамсааһынын иһинэн үлэлиир “Сыккыс” пионерскай оҕо түмсүүтэ 5-8 кылаас  үөрэнээччилэрин бүтүннүүтүн хабар.

Оскуола иитэр-үөрэтэр салаатын салайааччылара, тэрийээччи – педагогтар, оҕо бибилэтиэкэрдэрэ уруккуну умнубакка, пионерия үтүө үгэһигэр тирэҕирэн, айымньылаахтык улэлииллэр, оҕо хамсааһынын саҥа таһымҥа таһаарарга дьулуһаллар.

Сэмэн Жендринскэй