Олунньу 1-2 күннэригэр А.И.Федотов аатынан Элбэх функциялаах спорт комплексыгар волейболга эр дьоҥҥо уонна дьахталларга өрөспүүбүлүкэтээҕи түрнир ыытылла турар.
Бу күрэхтэһии РФ физическэй култууратын уонна спордун туйгуна, РФ Уопсай үөрэхтээһинин бочуоттаах үлэһитэ Петр Иванович Собакин сырдык кэриэһигэр ананна.
Онон спорт уораҕайыгар үгүс оҕону спортка уһуйбут, Арассыыйа таһымыгар тиийэ Чурапчы улууһун ааттаппыт ытык киһибит Петр Иванович үлэтин-хамнаһын, ситиһиитин, тус олоҕун сырдатар быыстапка турда.
Тэрээһин үөрүүлээх аһыллыытыгар улуус баһылыга Степан Саргыдаев, Чурапчытааҕы спорт институтуттан ректор Иннокентий Готовцев, профессор Михаил Гуляев эҕэрдэ тылы эттилэр. Ону сэргэ Петр Собакин кэргэнэ Галина Собакина, учуутала Николай Оконешников уонна бииргэ үөрэммит табаарыһа Гаврил Нохтунскай кыттыыны ыллылар.
Турнирга Амматтан, Дьокуускайтан, Мэҥэ Хаҥаластан, Намтан, Тааттаттан, Уус Алдантан, Хаҥаластан, Ньурбаттан уонна Чурапчыттан күрэхтэһэ кэлбит 160 спортсмен сэлэлии хааман киирдилэр. Кинилэргэ уонна ыалдьыттарга дойдубут гимнэ ньиргийдэ.
Икки күн устата эр дьоҥҥо 8, дьахталларга 8 хамаанда күөн көрсүөҕэ. Сүрүн судьуйанан бастакы категориялаах судьуйа Анатолий Чемерзанскай үлэлиэҕэ.
Кыайбыт хамаандалар кубогынан, мэтээлинэн уонна сыаналаах бириистэринэн наҕараадаланыахтара.
Марфа Петрова