Аҕа дойду Улуу сэриитин I-кы истиэпэннээх уордьан кавалера, Арассыыйа худуоһунньуктарын сойууһун чилиэнэ, биир дойдулаахпыт Петр Карсанаев төрөөбүтэ 100 сылыгар аналлаах улуустааҕы «Төрөөбүт дойдубар тапталым» уруһуй куонкуруһун кыайыылаахтарын чиэстээтилэр.
Чурапчытааҕы оҕо ускуустуба оскуолатын «Унисон» ансаамбыла ылбаҕай ырыаларын бэлэхтээтилэр. Сал. Светлана Аммосова./ Марфа Петрова түһэриитэ
Куонкуруска Чурапчы улууһун оҕо ускуустуба оскуолаларын уонна Кытаанахтааҕы эстетическай оскуола иитиллээччилэрэ кытыннылар. Уопсайа 59 үлэ киирэн, «Мунхалов планетата» арт-галереяҕа дьон көрүүтүгэр турдулар.
Тэрээһин үөрүүлээх чааһыгар «Мунхалов планетата» арт-галерея тэрийээччитэ Елена Дьячковская киирии тылы эттэ. Кини Петр Терентьевич талааннаах худуоһунньук буоларын сырдатта.
«Чурапчы кэрэ айылҕатын, тайҕа кыылларын, ытык сирдэрин уонна төрөөбүт түөлбэтин улуу дьонун мэтириэттэрин уруһуйдаабыт үлэлэрэ Петр Терентьевич төрөөбүт дойдутугар тапталын көрдөрөр», — диэтэ Елена Дьячковская.
Маны тэҥэ бэтэрээн-худуоһунньук 12 үлэтэ арт-галерея пуондатыгар хараллан сытарын бэлиэтээтэ.
Үөрүүлээх түгэнинэн эдэр худуоһунньуктары, педагогтары «Айылгы» НАДь дириэктэрэ Розалия Игнатьева, улуус бэтэрээннэрин Сэбиэтин бэрэссэдээтэлэ Матрена Матвеева эҕэрдэлээтилэр.
Куонкурус түмүгүнэн икки бөлөҕүнэн 6 кыайыылаах ааттанна. Ол курдук, 7-12 саастаах эдэр худуоһунньуктарга I-кы миэстэ Чурапчытааҕы оҕо ускуустуба оскуолатын иитиллээччитэ Сардаана Корякина, II-с миэстэ Дириҥнээҕи оҕо ускуустуба оскуолатын иитиллээччитэ Нарыйаана Кузьмина, III-с миэстэ Чурапчытааҕы оҕо ускуустуба оскуолатын иитиллээччитэ Коля Красильников буоллулар.
13-17 саастаахтарга I-кы миэстэни Кытаанахтааҕы эстетическай оскуола иитиллээччитэ Айыына Кронникова, II-с миэстэни Кытаанахтааҕы эстетическай оскуола иитиллээччитэ Света Пинигина, III-смиэстэни Чурапчытааҕы оҕо ускуустуба оскуолатын иитиллээччитэ Вика Макарова ыллылар.
Марфа ПЕТРОВА.
