Кулун тутар 9-10 күннэригэр, Александр Федотов аатынан успуорт уораҕайыгар, Хайахсыт нэһилиэгиттэн төрүттээх, остуол тенниһигэр РФ успуордун маастарыгар хандьыдаат, бойобуой дьайыы бэтэрээнэ (Сирия), СӨ чөмпүйэнээтин, Уһук Илин бэдэрээлинэй уокурук, “Урожай” ДСО хас даҕаны төгүллээх чөмпүйүөнэ, призера Николай Денисов сырдык кэриэһигэр аан бастакытын ыытыллар турнир түмүктэннэ.
Теннис успуордун сүгүрүйээччилэрэ, барыта холбоон 10 улуустан 130 ыспарсымыан кэлэн кыттыыны ылла.
“Хайахсыт орто оскуолатыгар 5 кылааска үөрэнэ сылдьан теннис сиэксийэтигэр дьарыктана кэлбитэ. Онно кэлэригэр кини бэйэтэ эрдэттэн эт-хаан өттүнэн кыахтаах уонна түргэн баҕайытык сүүрэр оҕо, кэлээт даҕаны мээчиги билэн-көрөн барбыта, улахан баҕалаах этэ. Ити кэмҥэ нэдиэлэҕэ үс күн дьарыктанарбыт, икки бөлөхтөөх этим, бастакыбар 15 оттон иккиспэр 10 иитиллээччи баара. Коля биир даҕаны дьарыгы көтүппэккэ, систиэмэлээхтик дьарыктанан 7-с кылаастан саҕалаан ситиһиилэнэн барбыта. Ону таба көрөннөр манна установочнай хомуурдарга Светлана Башарина, Василий Шадрин ыҥыраннар нэдиэлэ устата дьарыктыыллар этэ, онно сылдьан дьэ кини теннис тиэхэньикэтигэр сайдан барбыта: подрезканы, срезканы, подставканы толору баһылаабыта. Салгыы 10-11 кылаастарга тахсыытыгар өрөспүүбүлүкэҕэ оонньоон миэстэлэһэр буолбута. Ити кэмнэргэ улуус чиэһин элбэхтэ чиэстээхтик көмүскээбитэ, элбэх доҕоттордоммута, Тааттаттан Ньургун Сабарайкины, Михаил Эртюковы кытары табаарыстаһан, кинилэри кытары алтыһан өссө үчүгэйдик оонньуур буолан барбыта. Коля бэйэтэ баҕаран туран, сарсыардаттан хара киэһээҥҥи диэри оонньоон үрдүк ситиһиилэммит киһи буолар. Итиннэ барытыгар төрөппүттэрэ кинини улаханнык өйөөбүттэрэ, теннистииргэ анаан форма, ракетка ылан биэрбиттэрэ. Кытайга тиийэн эмиэ күрэхтэһэ сылдьыбыттааҕа. Оскуоланы бүтэрэн ЧГИФКиС-кэ устудьуоннуу сылдьан өрөспүүбүлүкэҕэ тиийэн Родион Сидоровы, Ньургун Сабарайкины о.д.а. кытары тэбис тэҥҥэ оонньообута”, — диэн остуол тенниһигэр Коля бастакы тириэньэрэ, успуорт бэтэрээнэ, СӨ физическэй култуураҕа уонна успуорка туйгуна Семен Васильев сэһэргээтэ.
“Чурапчыга олус үчүгэй күрэхтэһиини тэрийдилэр, элбэх кыттааччы кэллэ, 100-тэн тахса киһи. Коля бэйэтэ 5-с кылаастан саҕалаан тенниһинэн үлүһүйэн барбыта. Өрөспүүбүлүкэ чөмпүйэнээттэригэр элбэхтэ чөмпүйүөннүү, призердуу сылдьыбыта, уопсайынан ситиһиитэ элбэх этэ. Бу күрэхтэһиини көҕүлээбит киһинэн тириэньэрэ Светлана Николаевна буолар.
Биир дойдулаахтара, табаарыстара, аймахтара олус элбэх бирииһи туруордулар. Табылыннаҕына өссө 2-3 сылынан маннык хабааннаах турниры тэрийэр былааннаахпыт. Быраатым кыра эрдэҕиттэн мэник, сэниэлээх, биир миэстэҕэ сүгүн олорбокко наар сүүрэ, эккирии сылдьар уол этэ. Тус-туспа сирдэргэ үөрэнэр буоламмыт, каникул эҥин эрэ бириэмэлэригэр көрсүһэн ааһарбыт. Кэнники улаатан, үөрэҕин бүтэрэн баран Нам улууһугар күтүөттүү барбыта. Онно тиийэн оонньуурун, тириэньэрдиирин тохтотон тутуунан дьарыктаммыта, “УлууСтрой” тэрилтэҕэ үлэлээбитэ”, — диэн Коля бииргэ төрөөбүт убайа, Мэҥэ Хаҥалас улууһугар “Энергосбыт” тэрилтэ үлэһитэ Павел Денисов кэпсээтэ.
Күрэхтэһии түмүгүн билиһиннэрэр эбит буоллахха эр дьоҥҥо уонна дьахталларга саастарынан араарыллан күрэхтэстилэр. Итини сэргэ муҥутуур кыайыылааҕы быһаарар күрэх ыытылынна.
Дьахталларга
13-40 саастарыгар диэри
1 миэстэ – Анита Ноговицына (Амма);
2 миэстэ – Ольга Тихонова (Чурапчы);
3 миэстэ – Айыына Петрова (Амма).
41-61 саастарыгар диэри
1 миэстэ – Анна Ларионова (Амма);
2 миэстэ – Иза Назарова (Амма);
3 миэстэ – Мотрена Абрамова (Чурапчы).
61 саастарыттан үөһэ
1 миэстэ – Елизавета Матвеева (Нам);
2 миэстэ – Евдокия Другина (Дьокуускай);
3 миэстэ – Светлана Башарина (Чурапчы).
Эр дьоҥҥо
13-40 саастарыгар диэри
1 миэстэ – Михаил Кылабысов (Мэҥэ Хаҥалас);
2 миэстэ – Максим Федоров (Мэҥэ Хаҥалас);
3 миэстэ – Петр Иванов (Хаҥалас).
41-55 саастарыгар диэри
1 миэстэ – Артур Слепцов (Дьокуускай);
2 миэстэ – Константин Слепцов (Амма);
3 миэстэ – Василий Шадрин (Чурапчы).
56-70 саастарыгар диэри
1 миэстэ – Дмитрий Каженкин (Дьокуускай);
2 миэстэ – Иван Наумов (Чурапчы);
3 миэстэ – Еремей Куприянов (Мэҥэ Хаҥалас).
71 саастарыттан үөһэ
1 миэстэ – Радомир Сидоров (Горнай);
2 миэстэ – Семен Васильев (Чурапчы);
3 миэстэ – Петр Аммосов (Дьокуускай).
Дьахталларга муҥутуур кыайыылаах
1 миэстэ – Анита Ноговицына (Амма);
2 миэстэ – Айыына Петрова (Амма).
Эр дьоҥҥо муҥутуур кыайыылаах
1 миэстэ – Михаил Кылабысов (Мэҥэ Хаҥалас);
2 миэстэ – Максим Федоров (Мэҥэ Хаҥалас).
Сэмэн Жендринскэй. Ааптар хаартыскаҕа түһэриитэ