Бүгүн А.К.Софронов аатынан спортивнай комплекска бүтүн Аан дойдутааҕы доруобуйаларынан хааччахтаах дьон дэкээдэлэрин чэрчитинэн улуустааҕы олорон эрэ волейбол күрэҕэ саҕаланна.
Биһиги улууспут адаптивнай спорт бары көрүҥнэригэр көхтөөх, өрүү инники күөҥҥэ сылдьар кыттааччы буолар. Оттон чуолаан бу волейбол көрүҥэ сайдыбыта балайда буолла. Хамаандабыт өрөспүүбүлүкэҕэ бастыҥнар ахсааннарыгар киирсэр. Киэн туттар ыччаппыт, Арассыыйа спордун маастара Станислав Никитин олорон эрэ волейболга Арассыыйа сүүмэрдэммит хамаандатын чилиэнэ буолан Сахатын сирин, улууспутун ааттата сылдьара да элбэҕи этэр. Ону сэргэ Анна Заровняева, Игорь Афанасьев Саха сирин сүүмэрдэммит хамаандатыгар талыллан ситиһиилээхтик оонньуу сылдьаллар. Манна барытыгар, биллэн турар, тренер Афанасий Кузьмин өҥөтө, кылаата улахана саарбаҕа суох.
Күрэхтэһии үөрүүлээх аһыллыытыгар эҕэрдэ тылларын улуус мунньаҕын бэрэссэдээтэлэ Яков Оконешников, улуустааҕы спорт управлениетын салайааччыта Дьулус Егоров эттилэр итиэннэ «СӨ физкультурнай хамсааһынын 100 сыла» түөскэ анньыллар бэлиэни улуус сүүмэрдэммит хамаандатын тренеригэр Афанасий Кузьмиҥҥа, Арассыыйа сүүмэрдэммит хамаандатын чилиэнигэр Станислав Никитиҥҥэ уонна ГТО нормативтарын ситиһиилээхтик туттарбыт дьоҥҥо кыһыл, үрүҥ көмүс бэлиэлэри туттардылар. Күрэх сүрүн судьуйата Станислав Никитин кыттааччыларга ситиһиини баҕаран туран күрэхтэһии хаамыытын билиһиннэрдэ.
Сэттэ хамаанда икки бөлөҕүнэн арахсан илин-кэлин түсүһүү саҕаланна.
Наталья Сибирякова, ааптар хаартыскалара, видеоҕа устуута