А.И. Федотов аатынан Элбэх функциялаах спортивнай комплекска оҕолорго көҥүл тустууга бастыыр иһин күрэхтэһии саҕаланна. Бу икки күннээх күрэхтэһии Саха сирин үөрэнээччилэрин «Спортивные якутяне»спартакиадатын улуустааҕы сүүмэрдиир түһүмэҕэ буолар.
Тэрээһин үөрүүлээх аһыллыытыгар Илин эҥэрдээҕи үөрэх үлэһиттэрин форумун кыттыылаахтара — ыаллыы сытар улуустар баһылыктара, үөрэх салалтатын бэрэстэбиитэллэрэ, оҕолор уонна спорду сэҥээрээччилэр кыттыыны ыллылар.
Эдэр, кэскиллээх бөҕөстөрү улуус баһылыга Степан Саргыдаев, «Саха сирин кэнчээри ыччата» өрөспүүбүлүкэтээҕи тирэх киин дириэктэрин бастакы солбуйааччыта Александр Брызгалов, спорт бэтэрээнэ Семен Морфунов уонна күрэхтэһии сүрүн судьуйата Иннокентий Посельский эҕэрдэлээтилэр, ситиһиилэри баҕардылар.
Оҕолор саастарынан түөрт бөлөххө арахсан киирсиэхтэрэ: 2016-2017 сс., 2014-2015 сс., 2012-2013 сс. уонна 2010-2011 сс. Барыта 13 нэһилиэктэн 205 спортсмен 44 комплект мэтээл иһин 44 ыйааһыҥҥа күөн көрсүөхтэрэ. Онтон кыайыылаахтар икки ардыларыгар сыаналаах бириистэр оонньонуохтара.
Быйылгы, үһүс төгүлүн ыытыллар күрэҕи спорду өрө тутар Сылаҥ нэһилиэгин олохтооҕо, физкультура учуутала Егор Яковлев комментатордыаҕа.
Марфа Петрова.
