Чурапчыга Оҕо саас уйгулаах ыһыаҕын ыстылар

  

Арассыыйаҕа Дьиэ кэргэн, өрөспүүбүлүкэҕэ Оҕо саас, улууска Ыал саргыта сылларынан уонна “Боотур Уус сыдьааннара” муниципальнай бырагыраама чэрчитинэн, аан бастакытын улуустааҕы оҕо-аймах ыһыаҕа ыытылынна. Маҕаайы алааһыгар бары нэһилиэктэр оскуолаларын, Чурапчы нэһилиэгин уһуйааннарын иитиллээччилэрэ, үөрэнээччилэрэ уонна төрөппүттэр муһуннулар.

Ыһыах сүрүн сыалынан кэнчээри ыччакка саха төрүт үгэһин тарҕатыы, сиэри-туому тутуһарга иитии уонна өбүгэбит оонньууларыгар ыччаты сыһыарыы буолар.

Ыһыах үөрүүлээх аһыллыытыгар бары оскуолалар, уһуйааннар сэлэлээн хаамтылар. Улуус баһылыга Степан Саргыдаев, улуус дьокутааттарын Сэбиэтин бэрэссэдээтэлэ Яков Оконешников, үөрэх салалтатын начаалынньыга Юрий Посельскай, о.д.а эҕэрдэ тылларын эттилэр.

Оҕолорго анаан алгыс түстэ, кымыс үрдэ охторулунна уонна оҕо саас оһуохайын оһуохайдаатылар.

“Боотур Уус” оонньуутугар уолаттар икки күн устата тоҕус көрүҥҥэ күрэхтэстилэр, “Мин дьиэ кэргэним-көмүс биһигим” диэн хайысхаҕа уһуйаан иитиллээччилэрэ уонна алын кылаастар эбэ-эһэ тутта сылдьыбыт малларын, үрдүкү кылаастар бэйэлэрин төрүччүлэрин кэпсээтилэр. Хомуска, чабырҕахха, олоҥхоҕо, оһуохайга, сахалыы остуол оонньууларыгар, уһун суһуохха уонна саха төрүт көрүҥнэригэр күрэхтэстилэр. Дьиэ кэргэнинэн “Саха талба-мааны таҥаһа” куонкуруска кытыннылар. Уус кыһатын түһүлгэтигэр саха үгэс буолбут уус-уран оҥоһуктарын уонна ойуулуур искусствотын быыстапката турда.

Ыһыах талааннаах оҕолорбут кэнсиэрдэринэн түмүктэннэ.

Елена Макаринская