РСФСР норуотун үөрэҕириитин туйгуна, РФ үөрэҕириитин бочуоттаах үлэһитэ, СӨ физическэй култуураҕа уонна спортка туйгуна, А.К. Софронов аатынан бириэмийэ лауреата, икки төгүллээн Чурапчы улууһун уонна СӨ ытыы спордун бастыҥ тренерэ, Кытаанах нэһилиэгин, Чурапчы улууһун Бочуоттаах олохтооҕо Николай Смирников- Төлөөйүскэй үбүлүөйдээх 75 сааһын туолла.
Кини аатыгар анаммыт күрэххэ оҕолор, дьахталлар, эр дьон, бэтэрээннэр кыттыыны ылыахтара. 5 нэһилиэктэн барыта 46 кыттааччы суруттарда.
“Улууспутугар буулдьанан ытыы сайдыытыгар ханнык эмэ өттүнэн көмөнү оҥоруохха диэн уонна 2025 сыллаахха ыаллыы сытар Таатта улууһугар Манчаары оонньуулара буолуохтаахтар, онно хамаанданы сүүмэрдээн бэлэмнииргэ сыалланан-соруктанан бу күрэхтэһиини тэрийдибит. Тэрээһинин барытын Егор Потапов баһылыктаах нэһилиэк дьаһалтата оҥордо, мин сүбэһит-амаһыт эрэ быһыытынан сылдьабын.
Бэйэм үйэлээх сааспар биир чыркымайы таппатах киһибин, дьон онтон соһуйар эрээри, хайа баҕарар дьыалаҕа толкуйдаан, тэрээһин өттүн кыайа тутан дьарыктаннахха, элбэх үлэни үлэлээтэххэ, түмүгэ көстөр.
Оҕолору дьарыктыырбар хас биирдиилэрин ис кыахтарын көрөн, ырытан көрөбүн, уратыларын учуоттуубун”, — диэн кэпсиир элбэх оҕону спортка уһуйбут, маастардары иитэн таһаарбыт Николай Федорович.
Күрэхтэһии үөрүүлээх чааһыгар улуус баһылыга Степан Саргыдаев Николай Федорович улуус үөрэҕириитигэр, спортка киллэрбит кылаатын сыаналаан туран, “Оройуонун иннигэр үтүөлэрин иһин” 2-с истиэпэннээх бэлиэни туттарда.
Санатан эттэххэ, Николай Смирников иитиллээччилэрин ортолоругар буулдьалаах бэстилиэтинэн ытыыга Россия спордун маастара Уйусхан Захаров, СӨ спордун маастардара, Россия спордун маастарыгар кандидаттар Валерий Яковлев, Михаил, Роман Аржаковтар, о.д.а. бааллар.
Елена Макаринская