Бүгүн, алтынньы 29 күнүгэр, Чурапчытааҕы Е.А.Борисов аатынан бибилэтиэкэ-архыып сырдык, сылаас уораҕайыгар «Үүн-сайын» диэн медиалаборатория аһыллыыта үөрүүлээх быһыыга-майгыга ыытылынна. Билиҥҥи кэмҥэ тэрилтэлэр, түмсүүлэр, чааһынай да дьон араас хайысханан бырайыак көмүскээннэр идиэйэлэрин олоххо киллэрэр кыахтаналлар. Ол курдук бу медиалаборатория эмиэ биир улахан бырайыак иһигэр киирэн саамай аныгы, кыамталаах оборудованиенан хааччылынна.
Үөрүүлээх тэрээһиҥҥэ Чурапчытааҕы Е.А.Борисов аатынан бибилэтиэкэ-архыып дириэктэрэ Айталина Смирникова киирии тылы эттэ, улууспут аҕа баһылыга Степан Саргыдаев, култуураҕа управление начаалынньыга Петр Гуляев эҕэрдэлээтилэр уонна бырайыак ааптарын Римма Петрованы кытары аалай кыһыл лиэнтэни быстылар.
Билиҥҥи кэмҥэ «Үүн-сайын» медиалаборотория иһинэн 5 куруһуок утумнаахтык үлэлиир: «Гончарное мастерство» (салайааччы А. П. Гоголев аатынан оҕо ускуустубатын оскуолатын преподавателя П. А. Екечьямов), «Кройка и шитье» (салайааччы СӨ норуотун маастара Н. П. Ахматова), «Волшебные кисточки» уруһуй куруһуога (салайаачы эбии үөрэхтээһин педагога А. В Собакина), «Умсулҕан» куруһуога (сал. киин бибилэтиэкэ үлэһитэ М. Н. Захарова), «Эмтээх от» куруһуок (сал. киин бибилэтиэкэ үлэһитэ Маркова В. Е.). Маны таһынан олус интэриэһинэй маастар кылаастар ыытыллаллар. Бу куруһуоктарга, маастар кылаастарга дьон дьарыктанан, дьоҕурдарын, сатабылларын сайыннаран, элбэххэ үөрэнэллэр, бэйэлэрин илиилэринэн оҥорон астыналлар. Медиалабороторияҕа инникитин саҥа куруһуоктар, дьарыктар, маастар кылаастар итиэннэ видео монтаж, анимация, графический дизайн эйгэтигэр эдэр ыччаты кытта ситимнээх үлэ былааннаналлар. Эдэр ыччаттар, блогердар кэлэн маастар кылаастары ыытыахтара, аҕа саастаах дьоҥҥо күннээҕи олоххо компьютеры сатаан туһанарга сүбэ-ама биэриэхтэрэ.
Бу курдук үчүгэй, саҥа технологиянан баай медиалаборотория дьоҥҥо-сэргэҕэ билиини-көрүүнү, информацияны тарҕатар, сырдатар, айар-тутар дьоҕурдарын, сатабылларын сайыннарарга бигэ олук буолар эйгэни тэрийиэ диэн эрэллээхпит.
Наталья Сибирякова, ааптар видеоҕа устуута, Елена Макаринская хаартыскалара